(ញូវដែលី)៖ កាលពីថ្ងៃព្រហស្បតិ៍សប្តាហ៍នេះ រដ្ឋមន្រ្តីការបរទេសឥណ្ឌា លោក Subrahmanyam Jaishankar បានជួបជាមួយ​សមភាគីចិនរបស់លោក គឺលោក Wang Yi នៅឯប្រទេសកាហ្សាក់ស្ថាន ហើយអ្នកទាំងពីរបានមូលមតិគ្នា លើការបង្កើនកិច្ចប្រឹងប្រែង ដើម្បីដោះស្រាយបញ្ហាតាមបណ្តោយព្រំដែននៃប្រទេសទាំងពីរ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី៥ ខែកក្កដា ឆ្នាំ២០២៤។

ទីក្រុងញូវដែលីបានឱ្យដឹងថា លោក Jaishankar និងលោក Wang បានជួបគ្នានៅក្រៅកិច្ចប្រជុំកំពូល នៃអង្គការកិច្ចសហប្រតិបត្តិការ​សៀងហៃ ហៅកាត់ SCO ក្នុងរដ្ឋធានី Astana របស់កាហ្សាក់ស្ថាន ជាទីដែលប្រមុខការទូតទាំងពីរ បានបង្ហាញការយល់ឃើញដូចគ្នាថា ការអូសបន្លាយស្ថានការណ៍បច្ចុប្បន្ននៅតំបន់ព្រំដែន គឺមិនមែនជារឿងល្អ សម្រាប់ភាគីណាមួយឡើយ។

យោងតាមសេចក្តីថ្លែងការណ៍របស់រដ្ឋាភិបាលឥណ្ឌា ភាគីទាំងពីរបានឯកភាពគ្នាបង្កើនជំនួបពិភាក្សា រវាងក្រុមមន្រ្តីការទូតនិងយោធា ដើម្បី​ដោះស្រាយ បញ្ហានៅសេសសល់ទាំងឡាយ ឱ្យបានឆាប់ៗ។ រីឯបើតាមក្រសួងការបរទេសចិន ក្នុងជំនួបជាមួយលោក Jaishankar លោក Wang បានលើកឡើងថា ចិននិងឥណ្ឌាគួរតែគ្រប់គ្រងឱ្យបានត្រឹមត្រូវ នូវចំណុចខ្វែងគំនិតគ្នា ហើយធានាថា ទំនាក់ទំនងទ្វេភាគីឆ្ពោះទៅមុខ នៅ​លើគន្លងផ្លូវមួយ ដែលមានស្ថិរភាព។

គួរបញ្ជាក់ថា ទាំងឥណ្ឌា ទាំងចិន សុទ្ធតែបានពង្រឹងទីតាំងរបស់ខ្លួន ហើយដាក់ពង្រាយកងទ័ពក៏ដូចជាសម្ភារៈបន្ថែម នៅតាមបណ្តោយ​ព្រំដែន ចាប់តាំងពីឆ្នាំ២០២០មក ជាពេលដែលហេតុការណ៍ប្រឈមមុខយោធាមួយ បានផ្ទុះឡើង ហើយបណ្តាលឱ្យទាហានឥណ្ឌា ​យ៉ាងហោច២០នាក់ និងកងទ័ពចិនយ៉ាងហោច៤នាក់ បាត់បង់ជីវិត។ ប្រទេសមានអាវុធនុយក្លេអ៊ែរទាំងពីរ គឺជាអ្នកជិតខាងគ្នា ដែលមាន​ទំនាក់ទំនងតានតឹង រាប់ទសវត្សរ៍មកហើយ ក្រោយសង្រ្គាមបង្ហូរឈាម នៅព្រំដែនកាលពីឆ្នាំ១៩៦២៕