(តេហេរ៉ង់)៖ ដំណើរការបោះឆ្នោតបាននិងកំពុងតែប្រព្រឹត្តទៅ នាថ្ងៃសុក្រនេះ សម្រាប់ការបោះឆ្នោតជ្រើសរើសប្រធានាធិបតី ជុំចុងក្រោយ រវាងលោក Masoud Pezeshkian ដែលមាននិន្នាការកំណែទម្រង់និយម និងលោក Saeed Jalili ដែលជាអភិរក្សនិយមខ្លាំង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី៥ ខែកក្កដា ឆ្នាំ២០២៤។

ក្រសួងមហាផ្ទៃអ៉ីរ៉ង់ បានប្រកាសយ៉ាងដូច្នេះថា «ពួកយើងកំពុងចាប់ផ្តើមជុំទី២ នៃការបោះឆ្នោតប្រធានាធិបតីលើកទី១៤ ដើម្បីជ្រើសរើស​ប្រធានាធិបតីថ្មី ក្នុងចំណោមបេក្ខជន២រូប នៅតាមមណ្ឌលបោះឆ្នោតសរុបចំនួន ៥៨,៦៣៨កន្លែង ក្នុងប្រទេស ព្រមទាំងនៅតាមមណ្ឌលនានា ដែលនៅក្រៅប្រទេស»។

ក្នុងការបោះឆ្នោតជុំទី១ កាលពីសប្តាហ៍មុន លោក Pezeshkian ដែលជាបេក្ខជនកំណែទម្រង់និយមតែម្នាក់គត់ ដែលត្រូវបានអនុញ្ញាត​ឱ្យឈរឈ្មោះប្រកួតប្រជែង បានឈ្នះសំឡេងគាំទ្រច្រើនជាងគេបង្អស់ គឺប្រមាណជា៤២ភាគរយ ខណៈលោក Jalili ដែលជាអតីតមន្រ្តីទទួលបន្ទុកចរចាបញ្ហា​នុយក្លេអ៊ែរ ទទួលបានការគាំទ្រ ស្ថិតនៅចំណាត់ថ្នាក់ទី២ ជាមួយសំឡេង៣៩ភាគរយ។ ចំណែកឯ បេក្ខជន២នាក់ផ្សេងទៀត គឺប្រធានសភាអ៉ីរ៉ង់ លោក Mohammad Bgher Ghalibaf ឈរនៅលេខរៀងទី២ ជាមួយសំឡេង១៣.៨ភាគរយ ខណៈបុព្វជិត ឈ្មោះ Mostafa Pourmohammadi ទទួលបានការគាំទ្រមិនដល់ សូម្បីតែ១ភាគរយ។

គួរបញ្ជាក់ថា ការបោះឆ្នោតជ្រើសរើសប្រធានាធិបតីអ៉ីរ៉ង់ ដំបូងឡើយគឺត្រូវធ្វើឡើងនៅឆ្នាំ២០២៥ឯណោះទេ ប៉ុន្តែវាបានប្រព្រឹត្តទៅមុន​ពេលកំណត់បែបនេះ ដោយសារប្រធានាធិបតីលោក Ebrahim Raisi បានទទួលមរណភាព នៅក្នុងគ្រោះថ្នាក់ធ្លាក់ឧទ្ធម្ភាគចក្រ កាលពីខែឧសភា។ តែ៤០ភាគរយប៉ុណ្ណោះ នៃប្រជាជនអ៉ីរ៉ង់មានសិទ្ធិបោះឆ្នោតសរុប ៦១លាននាក់ ដែលបានទៅចូលរួមបោះឆ្នោត ពោលគឺជាអត្រាទាបបំផុត គិតចាប់តាំងពីបដិវត្តន៍អ៉ីស្លាម ឆ្នាំ១៩៧៩។ កាលពីថ្ងៃពុធសប្តាហ៍នេះ មេដឹកនាំកំពូលអ៉ីរ៉ង់ លោក Ayatollah Ali Khamenei ដែលជាអ្នកមានសិទ្ធិសម្រេចផ្តាច់មុខគ្រប់បែបយ៉ាង ចំពោះកិច្ចការរដ្ឋរបស់អ៉ីរ៉ង់ បានអំពាវនាវឱ្យប្រជាជន ទៅចូលរួមបោះឆ្នោតឱ្យផុសផុល ជាងការបោះឆ្នោតជុំទី១ សម្រាប់ការបោះឆ្នោតជុំចុងក្រោយ៕