(អូតាវ៉ា)៖ កាលពីថ្ងៃព្រហស្បតិ៍សប្តាហ៍នេះ ប្រទេសកាណាដា បានដាក់ចេញនូវទណ្ឌកម្មលើក្រុមអ្នកតាំងលំនៅអ៉ីស្រាអែល ៧នាក់ ដោយអះអាងថា ពួកគេបានចូលរួមក្នុងអំពើហិង្សាជ្រុលនិយម នៅតំបន់ West Bank ហើយវាជាចំណាត់ការលើកទីពីររបស់ទីក្រុង Ottawa ក្នុងរយៈពេលជាងមួយខែ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៨ ខែមិថុនា ឆ្នាំ ២០២៤។

បុគ្គលដែលកាណាដា ប្រកាសដាក់ទណ្ឌកម្ម រួមមានទាំង លោក Ben-Zion Gopstein ស្ថាបនិក និងជាមេដឹកនាំអង្គការ Lehava ដែលគេស្គាល់ថាមាននិន្នាការស្តាំនិយម ប្រឆាំងនឹងការរួមបញ្ចូលគ្នានៃជនជាតិជ្វីហ្វ ជាមួយជាតិសាសន៍មិនមែនជ្វីហ្វ។ លោក Elisha Yered ជាអ្នកស្វែង​រកយុត្តិធម៌ ដោយ​ការ​សម្លាប់​ជនជាតិ​ប៉ាឡេស្ទីន ក្រោមហេតុផល​សាសនា និងលោក Shalom Zicherman ដែល​ក្រសួងការបរទេស​អាមេរិក​ នៅ​ឆ្នាំ​នេះ ​អះអាង​ថាបាន​វាយ​ប្រហារ​លើសកម្មជន​អ៉ីស្រាអែល និង​រថយន្ត​របស់​ពួកគេ​នៅ​តំបន់ West Bank។

រដ្ឋមន្រ្តីការបរទេសកាណាដា លោកស្រី Melanie Joly បានបញ្ជាក់ក្នុងសេចក្តីថ្លែងការណ៍ថា «យើង​នៅ​តែ​​ព្រួយ​បារម្ភ​ខ្លាំង​ ជុំវិញអំពើ​ហិង្សា​ពីសំណាក់ក្រុមអ្នក​តាំង​ទីលំនៅ​ ដែលមានគំនិតជ្រុល​និយម​ នៅតំបន់ West Bank ហើយ​ថ្កោលទោសនូវ​ទង្វើ​បែប​នេះ ដែលមិន​ត្រឹម​តែ​ប៉ះ​ពាល់ដល់អាយុជីវិត​ជន​ជាតិ​ប៉ាឡេស្ទីន​ប៉ុណ្ណោះ​ទេ ប៉ុន្តែ​​ក៏ប៉ះ​ពាល់ដល់ការ​រំពឹង​ទុក​អំពីសន្តិភាព​យូរអង្វែង សម្រាប់តំបន់​ផង​ដែរ»។

គួរបញ្ជាក់ថា ចំណាត់ការរបស់កាណាដា ធ្វើឡើងបន្ទាប់ពីមានធានការស្រដៀងគ្នានេះរបស់សម្ព័ន្ធមិត្ត រួមទាំងសហរដ្ឋអាមេរិក និងចក្រភអង់គ្លេស។​ ទណ្ឌកម្មនេះ ក៏នឹង​ហាម​ប្រាម​រាល់ការ​ប្រាស្រ័យ​ទាក់​ទង​ជាមួយបុគ្គល និងអង្គភាពទាំងនោះ ហើយ​រារាំងពួក​គេពីការ​ចូលទៅប្រទេស​កាណាដា៕