(ប៉េកាំង)៖ ចិនបានផ្តល់មូលនិធិសរុបជាង២.៣ពាន់លានយាន់ ឬស្មើនឹង៣១៦.៤លានដុល្លារអាមេរិក ដើម្បីជួយដល់កិច្ចប្រឹងប្រែងសង្រ្គោះ ការផ្តល់សម្ភារចាំបាច់បន្ទាន់ និងការរៀបចំផែនការ ស្របពេលគ្រោះទឹកជំនន់ និងគ្រោះរអិលបាក់ដី ដែលបង្កឡើងដោយការធ្លាក់ភ្លៀងយ៉ាងជោគជាំ​អស់រយៈពេលជិត២សប្តាហ៍ បានបង្កការបំផ្លិចបំផ្លាញ នៅតាមផ្នែកមួយចំនួននៃប្រទេសចិន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២៧ ខែមិថុនា ឆ្នាំ២០២៤។

នៅថ្ងៃព្រហស្បតិ៍នេះ ក្រសួងហិញ្ញវត្ថុនិងក្រសួងគ្រប់គ្រងគ្រាអាសន្នចិន បានចេញមូលនិធិជំនួយទំហំ៤៩៦លានយាន់ទៀត សម្រាប់ខេត្តដូចជា Zhejiang, Anhui, Fujian, Jiangxi, Hubei, Hunan, Guizhou និង Guangdong ព្រមទាំងតំបន់ Guangxi។ បើតាម​ការគណនារបស់ Reuters ក្នុងពេលប៉ុន្មានថ្ងៃចុងក្រោយនេះ ស្ថាប័នរដ្ឋាភិបាលចិន បានផ្តល់ថវិកាសរុបចំនួន២.៣៤៤​ពាន់លានយាន់ ទៅកាន់បណ្តាទីក្រុងនិងខេត្តផ្សេងៗ ដើម្បីជួយដល់កិច្ចប្រឹងប្រែងសង្រ្គោះ ការរៀបចំផែនការ ក៏ដូចជាការផ្លាស់ទី អ្នកដែលរងគ្រោះ ដោយសារទឹកជំនន់។

គួរបញ្ជាក់ថា មនុស្សសរុបចំនួនរាប់សិបនាក់ ក៏បានបាត់បង់ជីវិតផងដែរ ដោយសារគ្រោះទឹកជំនន់ និងគ្រោះរអិលបាក់ ដែលបង្កឡើងដោយ​ភ្លៀងធ្លាក់ ខណៈតំបន់ភាគខាងត្បូងប្រទេសចិន បានរងការវាយប្រហារធ្ងន់ជាពិសេស ក្នុងឆ្នាំនេះ។ កាលពីសប្តាហ៍មុន ប្រធានាធិបតចិន លោក ស៉ី ជីនពីង បានអំពាវនាវឱ្យអាជ្ញាធរតាមមូលដ្ឋាន បង្កើនកិច្ចប្រឹងប្រែងឱ្យអស់ពីលទ្ធភាព ដើម្បីការពារអាយុជីវិតប្រជាជន ស្របពេលគ្រោះទឹកជំនន់ និងគ្រោះធម្មជាតិផ្សេងៗទៀត មានការកើនឡើង៕