(ប៉េកាំង)៖ ប្រធានាធិបតីចិន លោក ស៊ី ជីនពីង បាននិយាយថា មានបញ្ហាចាក់ឫសយ៉ាងជ្រៅនៅក្នុងគោលនយោបាយ មនោគមវិជ្ជា រចនាប័ទ្មការងារ និងវិន័យរបស់យោធាចិន នេះបើតាមទូរទស្សន៍ CCTV ដែលគ្រប់គ្រងដោយរដ្ឋ បានរាយការណ៍កាលពីថ្ងៃពុធ ចំពេលមានការបោសសំអាតយោធា ដែលកំពុងបន្តប្រឆាំងនឹងអំពើពុករលួយ។

លោក ស៊ី ត្រូវ​បាន​ដក​ស្រង់​សម្តី​ដោយ​និយាយ​ ក្នុង​សន្និសីទ​ការងារ​នយោបាយ​យោធា​ក្នុង​សប្តាហ៍​នេះ ​ក្នុង​ទីក្រុង Yan'an ដែល​ជា​មូលដ្ឋាន​រឹងមាំ​របស់​បក្ស​កុម្មុយនិស្ត​ចិន​ថា «មិនគួរ​មាន​កន្លែង​សម្រាប់​ធាតុ​ពុករលួយ​ក្នុង​ជួរ​កងទ័ព​ ដើម្បី​លាក់ខ្លួន​ឡើយ»។

លោកបន្តថា «កម្មាភិបាលគ្រប់លំដាប់ថ្នាក់ ជាពិសេសមន្ត្រីជាន់ខ្ពស់ ត្រូវតែចេញមុខ ហ៊ានលះបង់កិត្តិយស និងបង្ហាញចំណុចខ្វះខាត។ ពួកគេត្រូវតែឆ្លុះបញ្ចាំងយ៉ាងស៊ីជម្រៅ ធ្វើការកែតម្រូវដោយស្មោះ និងដោះស្រាយបញ្ហាដោយចាប់ផ្តើមពីការគិតរបស់ពួកគេ»។

គួរបញ្ជាក់ថា ការបោសសម្អាតប្រឆាំងអំពើពុករលួយដែលកំពុងបន្ត ក្នុងជួរកងទ័ពរំដោះប្រជាជន មានភាពគួរឱ្យកត់សម្គាល់ក្នុងរយៈពេលចុងក្រោយនេះ ដោយឧត្តមសេនីយ៍ចំនួនប្រាំបួនរូប និងនាយកប្រតិបត្តិមួយចំនួន ត្រូវបានបណ្តេញចេញពីពីឧស្សាហកម្មការពារដែនអាកាស។

នៅក្នុងសុន្ទរកថាដ៏សំខាន់ទៅកាន់កម្មាភិបាលយោធា លោក ស៊ី បានលើកឡើងពីភាពស្មុគស្មាញនៃបញ្ហាប្រឈមនាពេលបច្ចុប្បន្ន ដែលកំពុងប្រឈមមុខនឹងកងទ័ពរំដោះប្រជាជន (PLA) ចំពេលមានការផ្លាស់ប្តូរសំខាន់ៗនៅក្នុងសក្ដានុពលជាតិ បក្ស និងយោធា។ លោកក៏បានសន្យាថានឹងធ្វើឱ្យប្រសើរឡើង នូវវិធីសាស្រ្តក្នុងការស្វែងរក និងដោះស្រាយទម្រង់ផ្សេងៗនៃអំពើពុករលួយ រួមទាំងប្រភេទថ្មី និងប្រភេទលាក់កំបាំងផងដែរ។

សុន្ទរកថារបស់លោក ស៊ី បានគូសបញ្ជាក់ពីការប្តេជ្ញាចិត្តរបស់លោក ក្នុងការពង្រឹងការត្រួតពិនិត្យកម្មាភិបាលជាន់ខ្ពស់ និងធានានូវការទទួលខុសត្រូវនៅក្នុងជួរយោធា។ សន្និសីទនៅទីក្រុង Yan'an គឺជាពេលវេលាដ៏សំខាន់មួយក្នុងការដោះស្រាយបញ្ហាទាំងនេះ ព្រោះវាស្របពេលជាមួយនឹងកិច្ចខិតខំប្រឹងប្រែង ក្នុងការពង្រឹងកងទ័ពរំដោះប្រជាជនចិន និងរក្សាវិន័យចំពេលមានភាពតានតឹងផ្នែកភូមិសាស្ត្រនយោបាយ៕