(តៃប៉ិ)៖ នាថ្ងៃអាទិត្យនេះ មេដឹកនាំតៃវ៉ាន់ លោក Lai Ching-te បាននិយាយថា ចិនចាត់ទុកការក្រសោបយក និងការកម្ចាត់កោះតៃវ៉ាន់ ជាបុព្វហេតុដ៏អស្ចារ្យមួយរបស់ខ្លួន ហើយលោកបានប្រាប់ទៅកាន់ ក្រុមនិស្សិតនៅសាលាយោធាតៃវ៉ាន់មួយថា ពួកគេចាំបាច់ត្រូវតែស្គាល់​សត្រូវឱ្យច្បាស់ និងកុំប្រកាន់គំនិតបរាជ័យនិយម។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១៦ ខែមិថុនា ឆ្នាំ២០២៤។

ថ្លែងនៅទីក្រុង Kaohsiung នាឱកាសខួបនៃការបង្កើតសាលាបណ្ឌិតយោធា Whampoa លោក Lai បានលើកឡើងថា និស្សិតយោធា​នាពេលបច្ចុប្បន្ននេះ ចាំបាច់ត្រូវតែទទួលស្គាល់ បញ្ហាប្រឈមផ្សេងៗនៃយុគសម័យថ្មី។ លោកមេដឹកនាំតៃវ៉ាន់ បាននិយាយយ៉ាងដូច្នេះថា «បញ្ហាប្រឈមធំជាងគេបំផុត គឺត្រូវតទល់ជាមួយការកើនឡើងនៃអំណាចរបស់ចិន​ ដែលកំពុងធ្វើឱ្យខូចស្ថានភាពដើម​ នៅតំបន់ច្រកសមុទ្រតៃវ៉ាន់ ហើយចាត់ទុកការក្រសោបយក ក៏ដូចជាការកម្ចាត់កោះតៃវ៉ាន់ ជាបុព្វហេតុដ៏អស្ចារ្យរបស់ពួកគេ»។

លោក Lai បានបន្តថា ក្រុមនិស្សិតយោធាត្រូវតែការពារតៃវ៉ាន់ កុំឱ្យចិនវាយដណ្តើមយកបាន នៅថ្ងៃណាមួយ ហើយមានតែប្រជាជនតៃវ៉ាន់ផ្ទាល់ប៉ុណ្ណោះ ដែលមានសិទ្ធិសម្រេចលើ អនាគតររបស់ដែនកោះនេះ។ លោក Lai បានសង្កត់ធ្ងន់ដូច្នេះទៀតថា «យើងចាំបាច់ណាស់ត្រូវតែ មានសមត្ថភាពបែងចែករវាងខ្លួនយើង ហើយនិងសត្រូវរបស់យើង គឺរវាងមិត្តនិងសត្រូវ ហើយដាច់ខាតមិន​អាច ទទួលយកនូវគំនិតបរាជ័យនិយម ដែលថាសមរភូមិដំបូង គឺជាសមរភូមិចុងក្រោយ នោះឡើយ»។ ក្នុងឃ្លាចុងក្រោយនេះ លោក Lai ចង់សំដៅលើទ្រឹស្តីដែលថា តៃវ៉ាន់អាចនឹងត្រូវដួលរលំមួយរំពិច នៅពេលចិនបើកការវាយប្រហារណាមួយ។

គួរបញ្ជាក់ថា កោះតៃវ៉ាន់ត្រូវចិនចាត់ទុកជា ផ្នែកមិនអាចកាត់ផ្តាច់បាននោះទេ នៃទឹកដីរបស់ខ្លួន ហើយទីក្រុងប៉េកាំង បានប្តេជ្ញាយ៉ាងមុតមាំ​ថា នឹងបង្រួបបង្រួមគ្នាវិញនៅថ្ងៃណាមួយ ទោះត្រូវប្រើកម្លាំងយោធាក៏ដោយ ប្រសិនបើចាំបាច់។ លោក Lai ដែលបានឡើងកាន់តំណែង​ជាមេដឹកនាំតៃវ៉ាន់ថ្មី កាលពីខែឧសភា ត្រូវទីក្រុងប៉េកាំងចាត់ទុក ជាបុគ្គលចង់បំបែករដ្ឋដ៏គ្រោះថ្នាក់ម្នាក់។ ប៉ុន្មានថ្ងៃក្រោយលោកស្បថចូល​កាន់តំណែងជាផ្លូវការ ចិនបានធ្វើសមយុទ្ធយោធាឡោមព័ទ្ធកោះតៃវ៉ាន់៕