(វែលីងតោន)៖ នូវែលសេឡង់នាថ្ងៃព្រហស្បតិ៍នេះ បានទទួលស្វាគមន៍នាយករដ្ឋមន្រ្តីចិន លោក Li Qiang នៅឯទីក្រុងវែលីងតោន មុនការបើកកិច្ចជួបពិភាក្សាគ្នា រវាងរូបលោក ហើយនិងនាយករដ្ឋមន្រ្តីនូវែសេឡង់ ក្នុងដំណើរទស្សនកិច្ចលើកដំបូង របស់នាយករដ្ឋមន្រ្តី​នៃប្រទេសចិន មកកាន់ប្រទេសនូវែលសេឡង់ គិតចាប់តាំងពីឆ្នាំ២០១៧មក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី១៣ ខែមិថុនា ឆ្នាំ២០២៤។

មុនចាប់ផ្តើមកិច្ចពិភាក្សា លោក Li បាននិយាយយ៉ាងដូច្នេះថា «អ្នកទាំងអស់គ្នាដឹងហើយថា ស្ថានការណ៍អន្តរជាតិ កំពុងជួបប្រទះការប្រែប្រួលខ្លាំង ​និងមានលក្ខណៈស្មុគស្មាញ ប៉ុន្តែពួកយើងទាំងពីរ គឺចិននិងនូវែលសេឡង់ ផ្តល់សារសំខាន់យ៉ាងធំធេង ចំពោះកិច្ចប្រឹងប្រែងអភិវឌ្ឍទំនាក់ទំនងទ្វេភាគី។ យើងមានឆន្ទៈរឹងមាំដូចគ្នា ក្នុងការបង្កើនកិច្ចសហប្រតិបត្តិការ ដែលផ្តល់អត្ថប្រយោជន៍ឱ្យគ្នា ទៅវិញទៅមក»។ លោក Li បានបន្ថែមថា រូបលោកស្ម័គ្រចិត្ត ធ្វើការផ្លាស់ប្តូរទស្សនៈគ្នា ដោយបើកចំហត្រង់ៗ ជាមួយនាយករដ្ឋមន្រ្តីនូវែលសេឡង់ លោក Christopher Luxon។

គួរបញ្ជាក់ថា ដំណើរទស្សនកិច្ចរបស់លោក Li គឺជាទស្សនកិច្ចជាន់ខ្ពស់លើកទី២របស់ចិន មកកាន់ប្រទេសនូវែលសេឡង់ នៅក្នុងឆ្នាំនេះ បន្ទាប់ពីការបំពេញទស្សនកិច្ចរបស់ ​រដ្ឋមន្រ្តីការបរទេសចិន លោក Wang Yi កាលពីចុងខែមីនា។ បន្ទាប់ពីនូវែលសេឡង់ លោកនាយករដ្ឋមន្រ្តីចិន នឹងបន្តដំណើរទៅដល់ប្រទេសអូស្រ្តាលីថែមទៀត នាថ្ងៃសៅរ៍ចុងសប្តាហ៍នេះ ដើម្បីបំពេញទស្សនកិច្ច រយៈពេលសរុប៤ថ្ងៃ នៅទីនោះ៕