(យូអិន)៖ ក្រុមអ្នកការទូត បានឱ្យដឹងកាលពីថ្ងៃពុធសប្តាហ៍នេះថា ក្រុមប្រឹក្សាសន្តិសុខអង្គការសហប្រជាជាតិ (UN) ទំនងជានឹងធ្វើការបោះឆ្នោតនៅថ្ងៃព្រហស្បតិ៍នេះ ទៅលើសេចក្តីព្រាងនៃដំណោះស្រាយស្នើឡើងដោយចក្រភពអង់គ្លេស ដើម្បីទាមទារឱ្យបញ្ឈប់ការឡោមព័ទ្ធទីក្រុង Al-Fashir ក្នុងតំបន់ Dafur ភាគខាងជើងប្រទេសស៊ូដង់ ពីសំណាក់កងកម្លាំងទាហានប៉ារ៉ា (RSF)។ នេះបើយោងតាមការចេញផ្សាយដោយទីភ្នាក់ងាសារព័ត៌មាន Reuters នៅថ្ងៃព្រហស្បតិ៍ ទី១៣ ខែមិថុនា ឆ្នាំ ២០២៤។

សង្រ្គាមដណ្តើមអំណាចនៅស៊ូដង់ បានផ្ទុះឡើងកាលពីខែមេសា ឆ្នាំ ២០២៣។ ឥលូវនេះ ទីក្រុង Al-Fashir នៅក្នុងតំបន់ Darfur គឺជាជម្រករបស់អ្នកស្រុក និងជនភៀសខ្លួនជាង ១.៨លាននាក់ ហើយជាកន្លែងប្រយុទ្ធគ្នាថ្មីចុងក្រោយរវាងកងទ័ពស៊ូដង់ និងកងកម្លាំង RSF។ សេចក្តីព្រាងនៃដំណោះស្រាយដែល Reuters ទទួលបាន ក៏អំពាវនាវផងដែរ ឱ្យបញ្ឈប់ជាបន្ទាន់នូវការប្រយុទ្ធគ្នា បន្ធូរបន្ថយការភាពតានតឹងទាំងនៅក្នុង និងជុំវិញទីក្រុង ការដកកងកម្លាំងទាំងអស់ដែលគំរាមកំហែងដល់សុវត្ថិភាព និងសន្តិសុខរបស់ជនស៉ីវិល។ គេរំពឹងថា នឹងមានការបោះឆ្នោតលើសេចក្តីព្រាងនៃដំណោះស្រាយ តាមការស្នើរបស់អង់គ្លេសទៅកាន់ក្រុមប្រឹក្សា​សន្តិសុខ ដែលមានសមាជិកចំនួន ១៥រូប នារសៀល​ថ្ងៃ​ព្រហស្បតិ៍នេះ។ ដំណោះស្រាយមួយ ត្រូវការសំលេងគាំទ្រយ៉ាងតិច ៩សំលេង ហើយគ្មានការវេតូពីរុស្ស៉ី ចិន សហរដ្ឋអាមេរិក ឬបារាំង ដើម្បីអនុម័ត។

គួរបញ្ជាក់ថា កងកម្លាំង RSF និងសម្ព័ន្ធមិត្តរបស់ខ្លួន បានធ្វើការវាយលុកហួសពីរដ្ឋធានីនៃតំបន់ Darfur ទៅកាន់ទីក្រុងចំនួន ៤ផ្សេងទៀតគិតចាប់តាំងពីឆ្នាំមុន ហើយត្រូវបានស្តីបន្ទោសទៅលើយុទ្ធនាការមួយ ដែលនាំឱ្យមានប៉ះទង្គិចគ្នារហូតដល់ស្លាប់ ពីសំណាក់ក្រុមជនជាតិភាគតិចប្រឆាំងនឹងក្រុមមិនមែនអារ៉ាប់ ក៏ដូចជាការរំលោភបំពានផ្សេងទៀតនៅឯតំបន់ West Darfur៕