(មូស្គូ)៖ ស្នងការសិទ្ធិមនុស្សរុស្ស៉ី លោកស្រី Tatyana Moskalkova និយាយថា លោកស្រីបានលើកសំណើជាថ្មី​ ​ទៅកាន់មន្ត្រីជាន់ខ្ពស់អង្គការ​សហ​ប្រជាជាតិ (UN) និង​ក្រុមមន្ត្រី​ដទៃ​ទៀត​ ឱ្យ​ចាត់​វិធានការដើម្បី​ធានាដល់​ការ​ដោះលែងចំណាប់ខ្មាំង​ជនជាតិ​រុស្ស៉ី​ ដែល​ត្រូវក្រុមហាម៉ាសចាប់ពង្រត់ទៅកាន់តំបន់ហ្កាហ្សា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១២ ខែមិថុនា ឆ្នាំ ២០២៤។

ក្នុងចំណោមចំណាប់ខ្មាំងប្រហែល ២៥០នាក់ដែលត្រូវក្រុមហាម៉ាសចាប់ខ្លួន នៅក្នុងការវាយឆ្មក់ចូលទឹកដីអ៉ីស្រាអែល កាលពីថ្ងៃទី៧ ខែតុលា ឆ្នាំមុន មានចំណាប់ខ្មាំង​ ៨នាក់​កាន់​កាប់លិខិតឆ្លងដែន​រុស្ស៉ី ​ប៉ុន្តែ ៣នាក់​ត្រូវ​បាន​ដោះលែងហើយ។ បច្ចប្បន្ននៅសល់ ចំណាប់ខ្មាំងសរុប ១១៦នាក់ទៀតនៅទីនោះ។ លោកស្រី Moskalkova បានបញ្ជាក់ថា «តាមការសន្ទនាមួយ ម្តាយរបស់ចំណាប់ខ្មាំង បានរៀបរាប់អំពីស្ថានភាពរបស់ពួកគេ នៅឯហ្កាហ្សា»។

គួរបញ្ជាក់ថា លោកស្រី Moskalkova បានជួបឧត្តមស្នងការ UN ទទួលបន្ទុកសិទ្ធិមនុស្ស លោក Volker Turk និងប្រធានគណៈកម្មាធិការអន្តរជាតិនៃកាកបាទក្រហម លោកស្រី Mirjana Spoljaric ក៏ដូចជាមន្រ្តីផ្សេងទៀត។ ការលើកសំណើជាថ្មីនេះធ្វើឡើង បន្ទាប់ពីជំនួបមួយក្នុងទីក្រុងមូស្គូ ជាមួយសាច់ញាតិរបស់ចំណាប់ខ្មាំង៕