(បេរូត)៖ ការវាយប្រហារតាមផ្លូវអាកាសរបស់អ៉ីស្រាអែល ទៅលើភូមិ Jouya ស្ថិតនៅភាគខាងត្បូងនៃប្រទេសលីបង់ កាលពីយប់ថ្ងៃអង្គារ (ម៉ោងក្នុងតំបន់) បានសម្លាប់មេបញ្ជាការជាន់​ខ្ពស់​ម្នាក់នៃ​ក្រុមហេសប៊ូលឡា និងសមាជិក ៣នាក់ទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១២ ខែមិថុនា ឆ្នាំ ២០២៤។

ក្រុមហេសប៊ូលឡា បានទទួលស្គាល់ការស្លាប់នៃមេបញ្ជាការូបនោះ ដោយនៅក្នុងសេចក្តីថ្លែងការណ៍បញ្ជាក់ថា ជាលោក Taleb Abdallah ដែលគេស្គាល់ថាឈ្មោះ Abu Taleb។ លោក Abu Taleb គឺជាសមាជិកខ្ពស់​បំផុតមួយរូប​របស់ក្រុមហេសប៊ូលឡា ​ដែល​ត្រូវ​បាន​សម្លាប់​ក្នុង​រយៈពេល​ ៨​ខែ​នៃ​ការ​បាញ់ផ្លោងដាក់គ្នា​ជាមួយអ៉ីស្រាអែល។ សន្តិសុខម្នាក់ប្រាប់ Reuters ថា លោក Abu Taleb ត្រូវ​​​កំណត់​អត្តសញ្ញាណបានថា​ ជា​មេ​បញ្ជាការ​ក្រុម​តំបន់កណ្តាល​នៃ​ព្រំដែន​ភាគ​ខាង​ត្បូងលីបង់។ ក្រៅពីនេះ សមាជិកហេសប៊ូលឡា ៣នាក់ទៀត ក៏ត្រូវបានសម្លាប់ក្នុងការវាយប្រហារនោះដែរ។ ប៉ុន្តែ ភ្លាមៗ នៅមិនទាន់មានការអត្ថាធិប្បាយពីសំណាក់អ៉ីស្រាអែលទេ។

គួរបញ្ជាក់ថា សមាជិកក្រុមហេសប៊ូលឡាប្រហែល ៣០០នាក់ រួមមានទាំងមេបញ្ជាការសំខាន់ៗ ត្រូវបានសម្លាប់ ក្នុងការវាយប្រហាររបស់អ៉ីស្រាអែលទៅលើប្រទេសលីបង់ គិតចាប់តាំងពីខែតុលា គឺនៅពេលដែលសង្រ្គាមហ្កាហ្សាផ្ទុះឡើង៕