(ស៉ីដនី)៖ នៅថ្ងៃចន្ទនេះ នាយករដ្ឋមន្រ្តីអូស្រ្តាលី លោក Anthony Albanese បានថ្កោលទោសសកម្មភាពបង្កការបំផ្លិចបំផ្លាញ ទៅលើស្ថានកុងស៊ុលរបស់សហរដ្ឋអាមេរិកប្រចាំទីក្រុងស៉ីដនី បន្ទាប់ពីអគារមួយខ្នងបានរងការខូចខាត ដែលបើតាម​ប្រព័ន្ធ​ផ្សព្វផ្សាយស្រុក​ថា សកម្មភាពនោះ​ទំនង​ជា​ការ​តវ៉ាពីក្រុម​គាំទ្រ​ប៉ាឡេស្ទីន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១០ ខែមិថុនា ឆ្នាំ ២០២៤។

អគារនៃស្ថានកុងស៊ុលអាមេរិកស្ថិតនៅឯជាយក្រុង ភាគខាងជើងរដ្ឋធានីស៉ីដនី ត្រូវបានវាយឱ្យខូចខាត និងបាញ់ថ្នាំពណ៌ កាលពីវេលាម៉ោងប្រហែល ៣ទៀបភ្លឺថ្ងៃចន្ទ (ម៉ោងក្នុងតំបន់) បណ្តាលឱ្យខូចខាតទ្វារ និងបង្អូចចំនួន ៩។ អ្នកនាំពាក្យរបស់ប៉ូលិស​ បានប្រាប់ Reuters តាមទូរស័ព្ទថា «កាមេរ៉ាសុវត្ថិភាព បង្ហាញឱ្យឃើញ​មនុស្ស​ម្នាក់​ បិទ​មុខ ទំនងដូចជាមានកាន់​​ញញួរ​តូចមួយ។ ពេលនេះ ប៉ូលិសសហព័ន្ធអូស្ត្រាលី និងប៉ូលិសរដ្ឋ New South Wales កំពុងស៉ើបអង្កេត។

លោក Albanese បានប្រាប់សន្និសីទសារព័ត៌មានតាមកញ្ចក់ទូរទស្សន៍ ចេញពីទីក្រុងកង់បេរ៉ា យ៉ាងដូច្នេះថា «ខ្ញុំគ្រាន់តែអាចនិយាយថា ប្រជាជនគួរតែវែកញែកបញ្ហានយោបាយ ប្រកបដោយការគោរព។ សកម្មភាព ដូចជាការបាញ់ថ្នាំពណ៌ ទៅលើអគារនៃស្ថានកុងស៊ុលអាមេរិក មិនអាចជួយអ្វីបានទេ។ អ្នកប្រព្រឹត្តសកម្មភាពអាចត្រឹមតែជាប់ពាក់ព័ន្ធ នឹងបទល្មើសធ្វើឱ្យខូចខាតទ្រព្យសម្បត្តិ»។

គួរបញ្ជាក់ថា កាលពីខែមេសា ក៏ធ្លាប់មានករណីបាញ់ថ្នាំលើអគារដូចគ្នានេះ ខណៈស្ថានកុងស៊ុលអាមេរិក នៅឯទីក្រុង Melbourne ឯណោះវិញត្រូវបានសកម្មជនគាំទ្រប៉ាឡេស្ទីនគូរវាស កាលពីខែឧសភា៕