(មូស្គូ)៖ ប្រព័ន្ធផ្សព្វផ្សាយរុស្ស៉ី Vedomosti ដោយផ្អែកលើប្រភពការទូតដែលខ្លួនទទួលបាន បានរាយការណ៍នាថ្ងៃចន្ទនេះថា ប្រធានាធិបតីរុស្ស៉ី លោក វ៉្លាឌីមៀ ពូទីន គ្រោងនឹងបំពេញទស្សនកិច្ចទៅកាន់ប្រទេសកូរ៉េខាងជើង ព្រមទាំងវៀតណាម ក្នុងពេលប៉ុន្មានសប្តាហ៍ខាងមុខនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១០ ខែមិថុនា ឆ្នាំ២០២៤។

ឯកអគ្គរដ្ឋទូតរុស្ស៉ីប្រចាំកូរ៉េខាងជើង លោក Alexander Matsegora បានបញ្ជាក់ប្រាប់កាសែត Vedomosti ថា ទស្សនកិច្ច​របស់ លោក ពូទីន ទៅកាន់ព្យុងយ៉ាង គឺច្បាស់ជានឹងកើតឡើង ហើយកំពុងស្ថិតក្រោមការដំណើរការត្រៀមរៀបចំយ៉ាងសកម្ម។ Vedomosti បានអះអាងថា លោក ពូទីន ក៏អាចនឹងបំពេញទស្សនកិច្ច ទៅកាន់ប្រទេសវៀតណាមផងដែរ នៅអំឡុងដើមខែមិថុនា ហើយទស្សនកិច្ចនោះ ទំនងជានឹងធ្វើឡើងភ្លាមៗតែម្តង ក្រោយទស្សនកិច្ចនៅកូរ៉េខាងជើង។

គួរបញ្ជាក់ថា មេដឹកនាំកូរ៉េខាងជើង លោក គីម​ ជុងអ៊ុន បានទៅបំពេញទស្សនកិច្ចនៅប្រទេសរុស្ស៉ី កាលពីខែកញ្ញា ឆ្នាំមុន ហើយជួបពិភាក្សាគ្នា​ជាមួយលោក ពូទីន។ អំឡុងពេលនោះ លោក គីម បានទស្សនាមជ្ឈមណ្ឌលបង្ហោះយានអវកាស Vostochny នៅតំបន់ចុងបូព៌ានៃប្រទេសរុស្ស៉ី ហើយលោក ពូទីន បានសន្យាជួយ កូរ៉េខាងជើងផលិតផ្កាយរណប។ វិមានក្រឹមឡាំង ធ្លាប់និយាយថា រុស្ស៉ីចង់កសាងភាពជាដៃគូជាមួយកូរ៉េខាងជើង នៅក្នុងគ្រប់វិស័យទាំងអស់។ លើកចុងក្រោយបង្អស់ និងតែមួយលើកគត់ ដែលលោក ពូទីន បានទៅបំពេញទស្សនកិច្ចនៅកូរ៉េខាងជើង គឺកាលពីឆ្នាំ២០០០ ដែលជាឆ្នាំដំបូងនៃការកាន់អំណាចរបស់លោក ក្នុងនាមជាប្រធានាធីបតីរុស្ស៉ី៕