(ហាណូយ)៖ ក្នុងសប្តាហ៍នេះ រដ្ឋសភានៃប្រទេសវៀតណាម បានអនុម័តការតែងតាំងបុគ្គលជំនិតរបស់ប្រធានាធិបតី លោក To Lam ជា​រដ្ឋមន្រ្តីសន្តិសុខសាធារណៈថ្មី ខណៈប្រការនេះត្រូវគេមើលឃើញថា ជួយពង្រឹងឱកាសរបស់ លោក Lam ដើម្បីក្លាយជាអគ្គលេខាធិការបន្ទាប់ របស់គណបក្សកុម្មុយនិស្តវៀតណាម។ នេះបើតាមការដកស្រង់ការផ្សាយចេញពីសារព័ត៌មាន The Diplomat នាថ្ងៃសៅរ៍ ទី៨ ខែមិថុនា ឆ្នាំ២០២៤។

ក្នុងសេចក្តីសម្រេចមួយកាលពីថ្ងៃព្រហស្បតិ៍សប្តាហ៍នេះ រដ្ឋសភាវៀតណាមបានអនុម័តយល់ព្រម ចំពោះការតែងតាំង លោក Luong Tam Quang ជារដ្ឋមន្រ្តីសន្តិសុខសាធារណៈ សម្រាប់រយៈពេលដែលនៅសល់ទាំងប៉ុន្មាន នៃអាណត្តិឆ្នាំ២០២១-២០២៦។ បើតាម​សារព័ត៌មានវៀតណាម VnExpress លោក Quang ដែលមានវ័យ៥៩ឆ្នាំ កន្លងមក បានបម្រើជាអនុរដ្ឋមន្រ្តីសន្តិសុខសាធារណៈ ហើយលោកក៏ធ្លាប់កាន់តួនាទីផ្សេងៗទៀតផងដែរ នៅក្នុងវិស័យសន្តិសុខ។

លោក Quang បានឡើងកាន់តំណែងជួស រដ្ឋមន្រ្តីសន្តិសុខសាធារណៈមុន គឺលោក To Lam ដែលត្រូវបានតែងតាំងជា​ប្រធានាធីបតីវៀតណាម កាលពីខែឧសភា ជំនួសលោក Vo Van Thuong ដែលបានលាលែងពីតំណែង ចំពោះមុខ​យុទ្ធនាការបោសសំអាតអំពើពុករលួយ។ លោក Thuong ស្ថិតក្នុងចំណោមក្រុមមន្រ្តីជាន់ខ្ពស់ជាច្រើនរូប រួមមានទាំងអតីតប្រធានាធិបតី លោក Nguyen Xuan Phuc ផងដែរ ដែលត្រូវបានបង្ខំឱ្យលាលែងពីតំណែង អំឡុងយុទ្ធនាការបង្រ្កាបអំពើពុករលួយ ដឹកនាំដោយអគ្គលេខាធិការ​បក្សកុម្មុយនិស្តវៀតណាម លោក Nguyen Phuc Trong។

ការណ៍ដែលលោក Quang ត្រូវគេមើលឃើញថា ជាមនុស្សជំនិតរបស់លោក Lam កំពុងជួយពង្រឹងឱកាសរបស់លោក Lam ក្នុងការ​ក្លាយជាអ្នកបន្តវេនពីលោក Trong ដើម្បីកាន់តំណែងជា អគ្គលេខាធិការបក្សកុម្មុយនិស្តវៀតណាម នៅសមាជបក្សបន្ទាប់ នាអំឡុងដើម​ឆ្នាំ២០២៦។ សព្វថ្ងៃលោក Trong មានវ័យ៨០ឆ្នាំទៅហើយ។

គួរបញ្ជាក់ថា ក្នុងនាមជាប្រមុខក្រសួងសន្តិសុខសាធារណៈ និងជាអនុប្រធានគណៈកម្មាធិការដឹកនាំមជ្ឈិម ទទួលបន្ទុកប្រឆាំងអំពើពុករលួយ របស់បក្សកុម្មុយនិស្តវៀតណាម លោក Lam កន្លងមក បានដើរតួនាទីយ៉ាងសំខាន់ ក្នុងការអនុវត្ត​យុទ្ធនាការបោសសំអាតអំពើពុករលួយរបស់លោក Trong។ សិទ្ធិអំណាចនេះផ្តល់ឱ្យលោក Lam នូវអាវុធដ៏មានឥទ្ធិពលមួយ ប្រឆាំងនឹងគូប្រជែងនយោបាយរបស់ខ្លួន ហើយអនុញ្ញាតឱ្យលោក ត្រៀមលក្ខណៈខ្លួនឯង ដើម្បីជាបុគ្គលដែលអាចនឹងបន្តវេនពីលោក Trong ជាអគ្គលេខាធិការបក្ស ដែលជាតំណែងមានអំណាចធំជាងគេបង្អស់ នៅក្នុងប្រទេសវៀតណាម៕