(ហ្សាការតា)៖ កាលពីថ្ងៃព្រហស្បតិ៍សប្តាហ៍នេះ សភាប្រទេសឥណ្ឌូណេស៉ី បានសម្រេចអនុម័តយល់ព្រម ចំពោះសំណើស្តីពីការទទួលយក ការបរិច្ចាគនាវាចម្បាំង ១គ្រឿងពីកូរ៉េខាងត្បូង មកឱ្យកងទ័ពជើងទឹករបស់ខ្លួន ទោះបីមានក្តីកង្វល់ថា នាវាយោធាចំណាស់នោះ នឹងត្រូវការ​ការជួសជុលថែទាំ គិតជាទឹកប្រាក់ស្មើនឹងខ្ទង់ ៨៥លានដុល្លារ ក៏ដោយក្តី។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី៧ ខែមិថុនា ឆ្នាំ២០២៤។

រដ្ឋមន្រ្តីការពារជាតិឥណ្ឌូណេស៉ី និងត្រូវជាអនាគតប្រធានាធិបតីថ្មីនៃប្រទេសអាស៊ានមួយនេះ គឺលោក Prabowo Subianto បាននិងកំពុង​ជំរុញឱ្យមាន ការផ្លាស់ប្តូរបរិក្ខារយោធាចាស់ៗរបស់ឥណ្ឌូណេស៉ី ហើយចំណាយថវិការាប់ពាន់លានដុល្លារ ទៅលើយន្តហោះចម្បាំងព្រមទាំង​នាវាមុជទឹកថ្មីៗ។ ក៏ប៉ុន្តែ ការសម្រេចចិត្តរបស់លោក ក្នុងការទិញសម្ភារយោធាដែលប្រើប្រាស់រួច បានប្រឈមសំឡេងជំទាស់ ជាហេតុបង្ខំឱ្យ​ក្រសួងរបស់លោក ត្រូវបោះបង់ចោលផែនការ ទិញយន្តហោះចម្បាំងមួយទឹកពីប្រទេសកាតា ដែលបានរងការរិះគន់ថា យន្តហោះទាំងនោះ ហាក់ដូចជាចាស់ៗពេក។

អនុរដ្ឋមន្រ្តីការពារជាតិឥណ្ឌូណេស៉ី លោក Muhammad Herindra បានប្រាប់សភាឥណ្ឌូណេស៉ីថា នាវាចម្បាំងប្រភេទ corvette ឈ្មោះ Bucheon 773 របស់កូរ៉េខាងត្បូង ដែលមានអាយុកាល៣៦ឆ្នាំមកហើយ នឹងជួយបង្កើនសមត្ថភាពយោធារបស់ឥណ្ឌូណេស៉ី ប៉ុន្តែកងទ័ពជើងទឹកឥណ្ឌូណេស៉ី នឹងត្រូវចំណាយថវិកាប្រហែល៨៥លានដុល្លារ សម្រាប់ការងារជួសជុលថែទាំ និងថ្លៃចំណាយផ្សេងៗ​ទៀត មុនពេលវាអាចធ្វើប្រតិបត្តិការបាន។

លោក Herindra បានសង្កត់ធ្ងន់បន្ថែមថា ជម្រើសដែលប្រសើរបំផុតនោះ គឺទិញនាវាចម្បាំងថ្មីសន្លាង១គ្រឿងតែម្តង ប៉ុន្តែបញ្ហាត្រង់ថា វានឹងប្រើពេលវេលាយូរ ហើយម៉ូដែលថ្មី នឹងមានតម្លៃចន្លោះ៣០០-៥០០លានដុល្លារឯណោះ ក្នុង១គ្រឿង ខណៈនាវាចម្បាំង ដែលកូរ៉េខាងត្បូង​បរិច្ចាគឱ្យ ក្រោយជួសជុលថែទាំរួចរាល់ នឹងអាចប្រើប្រាស់បានរហូតដល់១០-១៥ឆ្នាំខាងមុខ៕