(មូស្គូ)៖ នៅថ្ងៃព្រហស្បតិ៍សប្តាហ៍នេះ វិមានក្រឹមឡាំងបានព្រមានប្រទេសលោកខាងលិចថា នឹងត្រូវគិតគ្នាជាមួយរុស្ស៉ី ប្រសិនបើអនុញ្ញាតឱ្យអ៊ុយក្រែនប្រើប្រាស់អាវុធដែលខ្លួនបានផ្គត់ផ្គង់ សម្រាប់វាយប្រហារលើទឹកដីរុស្ស៉ី ខណៈលោកប្រធានាធិបតី វ្ល៉ាឌីមៀ ពូទីន ថាកំពុងពិចារណាបំពាក់អាវុធនៅបរទេស សម្រាប់ការសងសឹកចំពោះសត្រូវ (លោកខាងលិច)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៧ ខែមិថុនា ឆ្នាំ ២០២៤។

ថ្លែងទៅកាន់ក្រុម​និពន្ធយក​ជាន់​ខ្ពស់​នៃបណ្តា​ទីភ្នាក់ងារ​ព័ត៌មាន​អន្តរជាតិ​ ក្នុង​ទីក្រុង St Petersburg លោក ពូទីន និយាយថា ទីក្រុងមូស្គូ កំពុងគិតគូរពីការបំពាក់អាវុធរយៈចម្ងាយឆ្ងាយកម្រិតខ្ពស់ ស្រដៀងគ្នាទៅនឹងអ្វីដែលលោកខាងលិចផ្តល់ឱ្យអ៊ុយក្រែន សម្រាប់ការពារពីសត្រូវលោកខាងលិច នៅជុំវិញពិភពលោក។ ការអត្ថាធិប្បាយរបស់លោក ពូទីន ចង់សំដៅទៅលើការប្រើប្រាស់មីស៉ីលរយៈចម្ងាយឆ្ងាយ ដែលសហរដ្ឋអាមេរិក និងចក្រភពអង់គ្លេសផ្គត់ផ្គង់ឱ្យអ៊ុយក្រែន។

អ្នកនាំពាក្យវិមានក្រឹមឡាំង​ លោក Dmitry Peskov បានប្រាប់ទូរទស្សន៍រដ្ឋ យ៉ាងដូច្នេះថា «ពួកគេគួរតែដឹងហើយនឹងមានអ្វីកើតឡើង និងគោលជំហររបស់យើង។ យើងនឹងមិនសម្របសម្រួលទៀតទេ»។ ដោយឡែក លោក Dmitry Medvedev អនុប្រធានក្រុមប្រឹក្សាសន្តិសុខជាតិ និយាយថា «សូមឱ្យសហរដ្ឋអាមេរិក និងសម្ព័ន្ធមិត្តបានភ្លក់រសជាតិ នៃការប្រើប្រាស់អាវុធរបស់រុស្ស៉ី ដោយផ្ទាល់ពីភាគីទី ៣»។

គួរបញ្ជាក់ថា លោក ចូ បៃដិន បានប្រាប់ ABC News កាលពីថ្ងៃព្រហស្បតិ៍ អំឡុងពិធីបុណ្យរំលឹកខួប D-Day នៅប្រទេសបារាំងថា អ៊ុយក្រែន ត្រូវបានដាក់កំហិតក្នុងការប្រើប្រាស់អាវុធដែលផ្គត់ផ្គង់ដោយសហរដ្ឋអាមេរិក ទៅកាន់គោលដៅនៅក្នុងប្រទេសរុស្ស៉ី។ ប៉ុន្តែ ថ្មីៗនេះសម្ព័ន្ធមិត្តលោកខាងលិចរបស់អ៊ុយក្រែន បានលើកឡើងនូវលទ្ធភាពនៃការពិនិត្យឡើងវិញ ទៅលើការដាក់កម្រិតឱ្យអ៊ុយក្រែនប្រើប្រាស់អាវុធសម្រាប់ប្រឆាំងរុស្ស៉ី។ តួយ៉ាង រដ្ឋមន្ត្រីការបរទេសអង់គ្លេស លោក David Cameron បានប្រាប់ Reuters ថា អ៊ុយក្រែន មានសិទ្ធិប្រើប្រាស់អាវុធដែលផ្តល់ដោយចក្រភពអង់គ្លេស ដើម្បីវាយប្រហារលើគោលដៅនានានៅក្នុងប្រទេសរុស្ស៉ី ហើយវាគឺអាស្រ័យលើទីក្រុងកៀវ ថាតើត្រូវធ្វើដូច្នេះដែរឬទេ៕