(ម៉ាឌ្រីដ)៖ ប្រទេសអេស្ប៉ាញ នៅថ្ងៃព្រហស្បតិ៍សប្តាហ៍នេះបានប្រកាសថា ខ្លួននឹងចូលរួមក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូង ប្រឆាំងនឹងអ៊ីស្រាអែលនៅតុលាការយុត្តិធម៌អន្តរជាតិ (ICJ) ជុំវិញការឈ្លានពានរបស់អ៊ីស្រាអែល ដែលកំពុងបន្តនៅក្នុងតំបន់ហ្គាហ្សាស្ទ្រីបប៉ាឡេស្ទីនដែលត្រូវបានឡោមព័ទ្ធ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរនៅថ្ងៃទី០៦ ខែមិថុនា ឆ្នាំ២០២៤។

រដ្ឋមន្ត្រីការបរទេសអេស្ប៉ាញ លោក Jose Manuel Albarez បានពន្យល់ថា ជំហាននេះមានគោលបំណងស្តារសន្តិភាពនៅតំបន់ហ្គាហ្សា និងមជ្ឈិមបូព៌ាឡើងវិញ។ លោកបានគូសបញ្ជាក់ពីជម្លោះដ៏គ្រោះថ្នាក់ដោយកត់សម្គាល់ថា «សង្រ្គាមទ្រង់ទ្រាយធំដែលមិនបែងចែករវាងគោលដៅស៊ីវិល និងយោធា» កំពុងកើនឡើងនៅហ្គាហ្សា។

គួរបញ្ជាក់ថា អាហ្រ្វិកខាងត្បូងបានដាក់ពាក្យបណ្ដឹងកាលពីខែធ្នូ ឆ្នាំ២០២៣ ដោយចោទប្រកាន់អ៊ីស្រាអែលថា បានប្រព្រឹត្តអំពើប្រល័យពូជសាសន៍នៅតំបន់ហ្គាហ្សា រំលោភលើអនុសញ្ញាប្រល័យពូជសាសន៍ឆ្នាំ ១៩៤៨។

ជាការឆ្លើយតប តុលាការយុត្តិធម៌អន្តរជាតិ (ICJ) នៅថ្ងៃទី២៦ ខែមករា បានបញ្ជាឱ្យអ៊ីស្រាអែល ចាត់វិធានការទប់ស្កាត់អំពើប្រល័យពូជសាសន៍ បញ្ឈប់ការញុះញង់ប្រឆាំងនឹងប៉ាឡេស្ទីន។ បន្ទាប់មកទៀតនៅថ្ងៃទី២៤ ខែឧសភា តុលាការដដែលនេះ ក៏បានទាមទារឱ្យបញ្ឈប់ជាបន្ទាន់ ចំពោះការវាយប្រហារដោយយោធាអ៊ីស្រាអែលនៅទីក្រុង Rafah។

លោក Albarez បាន​ចង្អុល​បង្ហាញ​ថា វិធានការ​បង្កាការពារទុកជាមុន ​ដែល​បាន​ធ្វើឡើង​ដោយ​តុលាការ​យុត្តិធម៌​អន្តរជាតិ​ មិន​ត្រូវ​បាន​អនុវត្ត​ពេញលេញ​ទេ។ ខណៈពេលដែលអេស្ប៉ាញមិនកាត់ទោសឧក្រិដ្ឋកម្មដោយខ្លួនឯង លោកបានសង្កត់ធ្ងន់ថា តួនាទីរបស់អេស្ប៉ាញគឺគាំទ្រដល់តុលាការក្នុងការបកស្រាយ និងអនុវត្តវិធានការទាំងនេះ។ ប្រទេស​អេ​ស្ប៉ា​ញ​នឹង​បញ្ជូន​របាយការណ៍​ទៅ​តុលាការ​យុត្តិធម៌​អន្តរជាតិ ​ដោយ​បញ្ជាក់​ពី​ការ​ចូលរួម​ក្នុង​សំណុំរឿង​នេះ​៕