(SAINT Petersburg រុស្ស៉ី)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយថារុស្ស៉ីមិនខ្វល់នោះទេថាតើនរណានឹងក្លាយជាប្រធានាធិបតីថ្មីរបស់សហរដ្ឋអាមេរិក ប៉ុន្តែលោកបានព្រលយថា ប្រព័ន្ធតុលាការអាមេរិកកំពុងត្រូវបានប្រើប្រាស់នៅក្នុងសមរភូមិនយោបាយមួយប្រឆាំងនឹងលោក ដូណាល់ ត្រាំ។ នេះបើតាមការចេញផ្សាយដោយទីភ្នាក់ងារសារព័ត៌មាន​ Reuters។

សង្រ្គាមរបស់លោក ពូទីន ប្រឆាំងនឹងអ៊ុយក្រែនកាលពីឆ្នាំ២០២២មក ដែលលោកផ្ទាល់អះអាងថាជាសកម្មភាពការពារខ្លួនប្រឆាំងនឹងការពង្រីកខ្លួនរបស់ NATO ដឹកនាំដោយសហរដ្ឋអាមេរិក បានធ្វើឱ្យទំនាក់ទំនងរវាងទីក្រុងវ៉ាស៊ីនតោន និងទីក្រុងមូស្គូ ធ្លាក់ចុះដល់កម្រិតទាបបំផុតមួយមិនធ្លាប់មាន ចាប់តាំងពីសម័យវិបត្តិមីស៊ីលគុយបាក្នុងឆ្នាំ១៩៦២មក។ ថ្លែងទៅកាន់សន្និសីទ សារព័ត៌មាន ជាមួយប្រព័ន្ធផ្សព្វផ្សាយបរទេសកាលពីថ្ងៃពុធ ទី៥ ខែមិថុនា ក្នុងវេទិកាសេដ្ឋកិច្ចមួយក្នុងទីក្រុង St Petersburg លោក ពូទីន បានចោទប្រកាន់រដ្ឋបាលលោក ចូ បៃដិន ដែលជាអ្នកផ្គត់ផ្គត់អាវុធដ៏ធំបំផុតឱ្យអ៊ុយក្រែនថាបានប្រព្រឹត្តកំហុសម្ដងហើយម្ដងទៀត។

នៅពេលត្រូវសាកសួរដោយអ្នកសារព័ត៌មាន Reuters ថាតើលោកផ្ទាល់ជឿថាលទ្ធផលបោះឆ្នោតប្រធានាធិបតីអាមេរិក នៅខែវិច្ឆិកាខាងមុខ អាចនឹងធ្វើឱ្យមានភាពខុសប្លែកសម្រាប់ទីក្រុងមូស្គូ ដែរ ឬក៏យ៉ាងណា? លោក ពូទីន បានឆ្លើយថា «ជាគោលការណ៍ យើងមិនខ្វល់នោះទេថាតើនរណាជាអ្នកឈ្នះ... តែយើងនឹងធ្វើការជាមួយគ្រប់ប្រធានាធិបតីទាំងអស់ដែលប្រជាជនអាមេរិក បានជ្រើសរើស»។

ដោយហៅលោក ចូ បៃដិន ជាអ្នកនយោបាយចាស់ទុំម្នាក់អាចព្យាករបាន លោក ពូទីន បានបញ្ជាក់ថាទីក្រុងមូស្គូនឹងមិនលូកលាន់ចូលកិច្ចការនយោបាយក្នុងស្រុករបស់សហរដ្ឋអាមេរិកឡើយ ប៉ុន្តែ ប្រមុខវិមានក្រឹឡាំងរូបនេះបានឆ្លៀតនិយាយថាប្រព័ន្ធតុលាការអាមេរិកកំពុងត្រូវបានប្រើប្រាស់ដោយគូសត្រូវនយោបាយរបស់លោក ដូណាល់ ត្រាំ ដើម្បីព្យាយាមបំផ្លាញឱកាសជាប់ឆ្នោតរបស់លោក ត្រាំ ជាយុទ្ធសាស្ត្រមួយដែលលោក ពូទីន យល់ថានឹងមិនទទួលបានជោគជ័យនោះទេ។

គួរបញ្ជាក់ថា គណៈវិនិច្ឆយនៃតុលាការក្រុងញូយ៉ក កាលពីថ្ងៃទី៣០ ខែឧសភាកន្លងទៅ បានសម្រេចថាអតីតប្រធានាធិបតីអាមេរិក លោក ដូណាល់ ត្រាំ មានពិរុទ្ធនៅក្នុងសំណុំរឿងក្លែងបន្លំឯកសារ របស់ក្រុមហ៊ុន ដើម្បីលាក់បាំងការសូកលុយបំបិទមាត់អតីតតារាថតកុនកូនជ្រូកម្នាក់ កុំឱ្យនិយាយពីទំនាក់ទំនងផ្លូវភេទរវាងអ្នកទាំង២ នៅមុនការបោះឆ្នោតប្រធានាធិបតីអាមេរិក កាលពីឆ្នាំ២០១៦។ ខាងក្រុមមេធាវីរបស់លោក ត្រាំ បានបញ្ជាក់ថានឹងប្ដឹងជំទាស់សេចក្ដីសម្រេចនេះ ខណៈលោកចៅក្រម Juan Merchan បានកំណត់យកថ្ងៃទី១១ ខែកក្កដា ដើម្បីប្រកាស សាលក្រមផ្តន្ទាទោសលោក ត្រាំ ពោល តែប៉ុន្មានថ្ងៃប៉ុណ្ណោះនៅមុនគណបក្សសាធារណរដ្ឋប្រកាសតែងតាំងលោក ត្រាំ ជាបេក្ខជនប្រធានាធិបតីតំណាងបក្សរបស់ខ្លួនជាផ្លូវការ មុនការបោះឆ្នោត ចូលមកដល់នៅថ្ងៃទី៥ ខែវិច្ឆិកាខាងមុខ៕