(វ៉ាស៉ីនតោន)៖ សហរដ្ឋអាមេរិក កាលពីថ្ងៃអង្គារសប្តាហ៍នេះ បានប្រកាសពីការបន្តទំនាក់ទំនងជិតស្និទ្ធជាមួយប្រទេសឥណ្ឌា ជាមួយនិងការពិភាក្សាលើក្តីបារម្ភអំពីស្ថានភាពសិទ្ធិមនុស្ស បន្ទាប់ពីការបោះឆ្នោតដែលលោក Narendra Modi ត្រូវកាន់តំណែងជានាយករដ្ឋមន្រ្តីនៅអាណត្តិថ្មីទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី៥ ខែមិថុនា ឆ្នាំ ២០២៤។

គណបក្សរបស់លោក Modi និងគណបក្សជាសម្ព័ន្ធមិត្តរបស់លោកបានទទួលជ័យជម្នះ ក្នុងការបោះឆ្នោតសកលដែលបាន ចាយពេលជាច្រើនសប្ដាហ៍មកនេះ។ អ្នកនាំពាក្យក្រសួងការបរទេសអាមេរិក បានគូសបញ្ជាក់ថា «ខ្ញុំរំពឹងថានឹងបន្តភាពជាដៃគូជិតស្និទ្ធ រវាងសហរដ្ឋអាមេរិក និងឥណ្ឌា ទាំងនៅកម្រិតរដ្ឋាភិបាល កម្រិតប្រជាជន និងប្រជាជន»។ អ្នកនាំពាក្យក្រសួងការបរទេស​ បានបន្ថែមថា «ពេលដែលយើងមានក្តីបារម្ភអំពីសិទ្ធិមនុស្ស ដូចជានៅក្នុងប្រទេសឥណ្ឌា យើងបានបង្ហាញចេញដោយបើកចំហ និងដោយផ្ទាល់ ទៅកាន់រដ្ឋាភិបាលឥណ្ឌា។ យើង​បាន​ធ្វើ​វា​រួចហើយ ហើយ​យើង​នឹង​បន្ត​ធ្វើ​ទៀត ដូច​ដែល​យើង​ធ្វើ​ជាមួយ​ប្រទេស​ផ្សេងទៀត នៅជុំវិញ​ពិភពលោក»។

គួរបញ្ជាក់ថា ក្នុងដំណើរទស្សនកិច្ចរបស់ លោក Modi ទៅកាន់សហរដ្ឋអាមេរិក កាលពីឆ្នាំមុន ប្រទេសទាំងពីរ បានប្រកាសកិច្ចព្រមព្រៀងជាច្រើនស្តីពីគ្រឿងអេឡិចត្រូនិក សារធាតុរ៉ែសំខាន់ៗ បច្ចេកវិទ្យា កិច្ចសហប្រតិបត្តិការលើវិស័យការពារជាតិ និងអវកាស៕