(ហ្សាការតា)៖ ប្រធានាធិបតីឥណ្ឌួណេស៉ី លោក Joko Widodo មានផែនការប្តូរទៅធ្វើការនៅក្នុងរដ្ឋធានីថ្មីរបស់ប្រទេសគឺ Nusantara វិញដោយយ៉ាងឆាប់គឺនៅចុងខែមិថុនានេះ មុនការសម្ពោធ​ផ្លូវការដែលគ្រោងទុក​ អំឡុង​ពិធី​បុណ្យ​ឯករាជ្យ​ជាតិ​ ​ថ្ងៃ​ទី១៧ ខែ​សីហា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី៤ ខែមិថុនា ឆ្នាំ ២០២៤។

រដ្ឋមន្រ្តីក្រសួងសាធារណការ និងលំនៅឋាន លោក Basuki Hadimuljono បានប្រាប់ប្រព័ន្ធផ្សព្វផ្សាយក្នុងស្រុក កាលពីថ្ងៃចន្ទសប្តាហ៍នេះថា លោក Widodo នឹងប្តូរទៅធ្វើការនៅរដ្ឋធានី Nusantara នៅពេលដែលបណ្តាញទឹកស្អាតត្រូវបានតរួចរាល់ ចូលទៅដល់ការិយាល័យរដ្ឋាភិបាល និងអគារនានានៃក្រសួង។ លោក Basuki បញ្ជាក់ថា «លោកប្រធានាធិបតីនឹងចាប់ផ្តើមធ្វើការ ក្នុងរដ្ឋធានីថ្មី នៅពេលដែលការផ្គត់ផ្គង់ទឹករួចរាល់។ នៅថ្ងៃទី៧ ខែមិថុនា ម៉ាស៉ីនបូមទឹកនឹងបញ្ជូនមកដល់តំបន់ Balikpapan នៃរដ្ឋធានី Nusantara ហើយការដំឡើងអាចបញ្ចប់នៅចុងខែមិថុនា ឬដើមខែកក្កដា»។

គួរបញ្ជាក់ថា Balikpapan គឺជាទីក្រុងដែលមានប្រជាជនច្រើនជាងគេទីពីរ នៃខេត្ត Kalimantan ភាគខាងកើត បន្ទាប់ពីទីក្រុង Samarinda ដែលជាទីរួមខេត្ត៕