(ប៉េកាំង)៖ យានអវកាស Chang'e-6 របស់ចិន នាថ្ងៃអង្គារនេះ បានហោះឡើងដោយជោគជ័យចេញពីផ្ទៃរបស់ព្រះចន្ទ នៅចំហៀងដែល​មិនបែររកផែនដី ឬហៅថា far side of the moon ដើម្បីនាំយកគំរូតាងដែលវាប្រមូលបានពីទីនោះ ត្រឡប់មកកាន់ភពរបស់យើងវិញ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី៤ ខែមិថុនា ឆ្នាំ២០២៤។

យាន Chang'e-6 បានចុះទៅដល់តំបន់រណ្តៅអាចម៍ផ្កាយដ៏ធំ ហៅថា South Pole-Aitken Basin របស់ព្រះចន្ទ កាលពីថ្ងៃអាទិត្យ​ចុងសប្តាហ៍មុន ខណៈបេសកកម្មរយៈពេលសរុប៥៣ថ្ងៃរបស់វា បានចាប់ផ្តើមកាលពីថ្ងៃទី៣ ខែឧសភា នៅពេលយានអវកាសនេះ ត្រូវបាន​បញ្ជូនចេញពីផែនដី។ យាន Chang'e-6 បានប្រើប្រាស់មធ្យោបាយ២ផ្សេងគ្នា ដើម្បីប្រមូលគំរូតាង ដោយវិធីទី១ គឺប្រើប្រាស់ឧបករណ៍ខួងយកវត្ថុធាតុនៅខាងក្រោមផ្ទៃព្រះចន្ទ ហើយវិធីទី២ គឺប្រើប្រាស់ដៃយន្ត ដើម្បីប្រមូលកម្ទេចកម្ទីថ្មនិងដី នៅលើផ្ទៃព្រះចន្ទផ្ទាល់។ វាជាលើកដំបូងឡើយ ដែលគំរូតាង​ត្រូវប្រមូលយកពីចំហៀង far side របស់ព្រះចន្ទ។

គួរបញ្ជាក់ថា ចិនធ្លាប់បានបញ្ជូនយានរ៉ូបូតផ្សេងៗទៀត ឱ្យទៅចុះចតនិងធ្វើប្រតិបត្តិការ នៅលើផ្ទៃព្រះចន្ទក៏ដូចជាភពអង្គារ (Mars) ហើយជាប្រទេសទី៣ ដែលមានសមត្ថភាពនាំយក មនុស្សដោយខ្លួនឯងផ្ទាល់ ឡើងទៅដល់ទីអវកាស។ ចិនមានគោលដៅបញ្ជូន ក្រុមអវកាសយានិក ទៅកាន់ឋានព្រះចន្ទ ឱ្យបាននៅត្រឹមឆ្នាំ២០៣០ ហើយគ្រោងសាងសង់មូលដ្ឋានមួយ នៅទីនោះថែមទៀតផង។ រីឯសហរដ្ឋអាមេរិកវិញ ក៏កំពុងមានផែនការបញ្ជូន ក្រុមអវកាសយានិកសាជាថ្មី ទៅកាន់ផ្ទៃព្រះចន្ទផងដែរ នៅឆ្នាំ២០២៦ តាមរយៈបេសកកម្ម Artemis 3 របស់ខ្លួន៕