(រ៉ូម)៖ បណ្តាមេដឹកនាំនៃក្រុមប្រទេស G7 បានសម្តែង «ការគាំទ្រយ៉ាងពេញទំហឹង» ហើយថានឹង​នៅ​ពី​ក្រោយ​កិច្ច​ព្រម​ព្រៀង​ឈប់​បាញ់ ​និង​ការ​ដោះលែង​ចំណាប់ខ្មាំង​ក្នុង​​សង្គ្រាម​ហ្កាហ្សា ​ដែលប្រកាសដោយ​ប្រធានាធិបតីសហរដ្ឋអាមេរិក ​លោក ចូ បៃដិន ជាមួយការ​អំពាវនាវ​ឱ្យ​ក្រុម​ហាម៉ាស​ទទួល​យកបទឈប់បាញ់​។ នេះបើយោងតាម ការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៤ ខែមិថុនា ឆ្នាំ២០២៤។

បើតាមសេចក្តីថ្លែងការណ៍កាលពីថ្ងៃចន្ទ កិច្ចព្រមព្រៀងនោះ នឹងនាំទៅរកបទឈប់បាញ់បន្ទាន់មួយសម្រាប់តំបន់ហ្កាហ្សា ការដោះលែងចំណាប់ខ្មាំងនៅសេសសល់ ការបង្កើនលំហូរជំនួយមនុស្សធម៌ចូលក្នុងតំបន់ និងការបញ្ចប់វិបត្តិយូរអង្វែង ផ្អែកលើផលប្រយោជន៍សន្តិសុខអ៉ីស្រាអែល និងសុវត្ថិភាពជនស៉ីវិល។ G7 ដែលមានអ៉ីតាលី ជាប្រធានប្តូរវេនក្នុងឆ្នាំនេះ បានគូសបញ្ជាក់ឡើងវិញនូវការគាំទ្រសម្រាប់​ផែនការនេះថា «វាជាមាគ៌ាដ៏​គួរ​ឱ្យ​ទុក​ចិត្ត​ឆ្ពោះ​ទៅ​រក​សន្តិភាព​ ឈាន​ទៅ​រក​ដំណោះស្រាយ​រដ្ឋ​ពីរ»។

គួរបញ្ជាក់ថា ផែនការកាលពីសប្តាហ៍មុនដែល លោក បៃដិន ពិពណ៌នាថាជាសំណើបទឈប់បាញ់របស់អ៉ីស្រាអែល គឺចែកចេញជាបីដំណាក់កាល ហើយទទួលបានប្រតិកម្ម ជាវិជ្ជមានពីក្រុមហាម៉ាស៕