(ញូវដែលី)៖ ប្រធានគណៈកម្មការរៀបចំការបោះឆ្នោតនៃប្រទេសឥណ្ឌា លោក Rajiv Kumar បានប្រាប់ក្រុមអ្នកសារព័ត៌មាន នៅថ្ងៃចន្ទនេះថា ប្រជាជនឥណ្ឌាសរុបចំនួន ៦៤២លាននាក់ បានចូលរួមបោះឆ្នោត ក្នុងដំណើរការបោះឆ្នោតសកល ដែលទើបតែបិទបញ្ចប់ ក្រោយប្រព្រឹត្តទៅ អស់រយៈពេល៦សប្តាហ៍។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី៣ ខែមិថុនា ឆ្នាំ២០២៤។

តួលេខខាងលើគឺខ្ពស់ជាងតួលេខ៦១២លាននាក់ នៃប្រជាជនឥណ្ឌា ដែលបានចូលរួមបោះឆ្នោត ក្នុងការបោះឆ្នោតសកល កាលពីឆ្នាំ២០១៩ ប៉ុន្តែបើគិតអំពីអត្រានៃអ្នកទៅបោះឆ្នោត ក្នុងចំណោមប្រជាជនដែលមានឈ្មោះក្នុងបញ្ជីបោះឆ្នោត គឺវាទាបជាង៥ឆ្នាំមុន ប្រហែល១ភាគរយ។ នៅក្នុង​ការបោះឆ្នោតសកលឥណ្ឌាឆ្នាំ២០២៤នេះ ៦៦.៣ភាគរយ នៃអ្នកមានឈ្មោះក្នុងបញ្ជីបោះឆ្នោត បានទៅចូលរួមបោះឆ្នោត ខណៈ​កាលពីឆ្នាំ២០១៩ គឺ៦៧.៤ភាគរយ។

គួរបញ្ជាក់ថា ដំណើរការបោះឆ្នោត នៅក្នុងប្រទេសដែលមានប្រជាជនច្រើនជាងគេបង្អស់ លើពិភពលោកមួយនេះ បានចាប់ផ្តើមតាំងតែពី​ថ្ងៃទី១៩ ខែមេសា ហើយមាន៧ដំណាក់កាល។ ការបោះឆ្នោតនៅដំណាក់កាលទី៧ ដែលជាដំណាក់កាលចុងក្រោយ បានបិទបញ្ចប់ទៅវិញ កាលពីថ្ងៃសៅរ៍ចុងសប្តាហ៍មុន ហើយការរាប់សន្លឹកឆ្នោត ព្រមទាំងការប្រកាសលទ្ធផលត្រូវគេរំពឹងថា នឹងធ្វើឡើងនាថ្ងៃអង្គារសប្តាហ៍នេះ។ នាយករដ្ឋមន្រ្តីឥណ្ឌា លោក Narendra Modi ត្រូវគេមើលឃើញថា ទំនងជានឹងបន្តទទួលជ័យជម្នះភ្លូកទឹកភ្លូកដី ៣អាណត្តិជាប់ៗគ្នា៕