(ប៉េកាំង)៖ ក្រសួងសន្តិសុខរដ្ឋចិន បានចេញសេចក្តីថ្លែងការណ៍មួយនៅថ្ងៃចន្ទនេះ ពីការរកឃើញថាសេវាស៉ើបការណ៍សម្ងាត់ MI6 របស់ចក្រភពអង់គ្លេស បានប្រែក្លាយបុគ្គលិកពីរនាក់នៃរដ្ឋាភិបាលចិន ឱ្យទៅជាភ្នាក់ងារចារកម្មសម្រាប់រដ្ឋាភិបាលអង់គ្លេស។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី៣ ខែមិថុនា ឆ្នាំ២០២៤។

ក្រសួងសន្តិសុខរដ្ឋចិន បានឱ្យដឹងថា ករណី​​ចោទប្រកាន់លើពីរ​នាក់​ប្ដី​ប្រពន្ធ​ កំពុង​ស្ថិត​ក្រោម​ការ​ស៉ើបអង្កេត​បន្ថែម​។ បើតាមសេចក្តីថ្លែងការណ៍ ចារកម្មជាប្ដីរូប នោះមាននាមត្រកូល Wang សិក្សានៅអង់គ្លេសក្នុងឆ្នាំ២០១៥ ក្រោមកម្មវិធីផ្លាស់ប្តូរមួយ ហើយត្រូវបានអញ្ជើញឱ្យចូលរួមអាហារពេលល្ងាច និងដំណើរកម្សាន្ត ដែលរៀបចំដោយ MI6 អំឡុងពេលនោះ។ លោក Wang ត្រូវបានចោទប្រកាន់ថា ចង់បានលុយ ហើយត្រូវបានទាក់ទាញឱ្យចូលធ្វើការជាអ្នកផ្តល់ប្រឹក្សាក្រៅម៉ោង ជាមួយនិងប្រាក់កម្រៃខ្ពស់ មុនពេលបុគ្គលិករបស់ MI6 ទាក់ទងគាត់ធ្វើការឱ្យរដ្ឋាភិបាលអង់គ្លេស ដោយសន្យាផ្តល់ប្រាក់រង្វាន់ច្រើនជាងនេះ ហើយលោកក៏បាន យល់ព្រម។ បន្ទាប់ពីទទួលការបង្ហាត់បង្រៀន MI6 បានបញ្ជាឱ្យលោក Wang ត្រលប់ទៅកាន់ប្រទេសចិន ដើម្បីប្រមូលព័ត៌មានសំខាន់ៗដែល ទាក់ទងនឹងរដ្ឋាភិបាលចិន។

ក្រសួងបានបញ្ជាក់ដែរថាលោក Wang បានបញ្ចុះបញ្ចូលឱ្យប្រពន្ធរបស់លោកមាននាមត្រកូល Zhou ដែលបម្រើការអង្គភាពរបស់រដ្ឋាភិបាលចិនចូលរួមជាមួយ ហើយប្រពន្ធរបស់លោកបានយល់ព្រម។

គួរបញ្ជាក់ថា ចិន និងអង់គ្លេសបានចោទប្រកាន់គ្នាទៅវិញទៅមក ជុំវិញបញ្ហាធ្វើ​ចារកម្មដែលបង្កការគំរាមកំហែងចំពោះសន្តិសុខជាតិរៀងៗខ្លួន។ កាលពីខែមករា ចិនបានបញ្ចេញរបាយការណ៍មួយស្តីពីករណីចារកម្មដោយចោទប្រកាន់ទៅលើភ្នាក់ងារ MI6 នេះថាបានប្រើជនបរទេសម្នាក់ ក្នុងប្រទេសចិន ដើម្បីប្រមូលព័ត៌មាន សម្ងាត់។ ចំណែក អង់គ្លេសវិញ កាលពីខែមេសា កន្លងទៅ បានចោទប្រកាន់មនុស្ស ២នាក់ពីបទផ្តល់ព័ត៌មានរសើបដល់ចិន ហើយកាលពីខែមុន បានចោទប្រកាន់ មនុស្ស ៣នាក់ ពីបទជួយដល់សេវាស៉ើបបការណ៍សម្ងាត់បរទេសរបស់ទីក្រុងហុងកុង៕