(សិង្ហបុរី)៖ នៅថ្ងៃអាទិត្យនេះ រដ្ឋមន្រ្តីការពារជាតិចិន លោក Dong Jun បាននិយាយថា លទ្ធភាពនៃការបង្រួបបង្រួមគ្នាវិញដោយ​សន្តិវិធីជាមួយតៃវ៉ាន់ កំពុងតែរងការសឹករេចរឹលកាន់តែខ្លាំងឡើងៗ ដោយចលនាចង់បំបែករដ្ឋ នៅតៃវ៉ាន់ផ្ទាល់ ហើយនិងកម្លាំងពីខាងក្រៅ ខណៈរូបលោកបានប្តេជ្ញាថា នឹងធានាមិនឱ្យឯករាជ្យអាចកើតមានឡើងទៅបាន សម្រាប់ដែនកោះនេះឡើយ។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters នាថ្ងៃអាទិត្យ ទី២ ខែមិថុនា ឆ្នាំ២០២៤។

ថ្លែងក្នុងសន្និសីទសន្តិសុខ Shangri-La Dialogue នៅប្រទេសសិង្ហបុរី លោក Dong បាននិយាយថា តៃវ៉ាន់គឺជាចំណុចស្នូលបំផុត នៃបញ្ហាស្នូលនានាសម្រាប់ប្រទេសចិន ប៉ុន្តែគណបក្សកាន់អំណាច DPP នៃកោះតៃវ៉ាន់ កំពុងតែធ្វើសកម្មភាពបំបែករដ្ឋកាន់តែខ្លាំងឡើង ហើយងប់ងល់ជាមួយគំនិតចង់លុបបំបាត់ចោល នូវអត្តសញ្ញាណចិនរបស់ខ្លួន។ លោក Dong បានបន្ថែមថា ស្របពេលដែលចិន ប្តេជ្ញាចង់​បង្រួបបង្រួមគ្នាវិញជាមួយតៃវ៉ាន់ ដោយសន្តិវិធីក៏ដោយ យោធាចិននឹងនៅតែជាកម្លាំងដ៏រឹងមាំមួយ ដើម្បីរក្សាការពារគោលដៅបង្រួបបង្រួម​ជាតិ។

លោកប្រមុខការពារជាតិចិន បានសង្កត់ធ្ងន់ដូច្នេះថា «យើងនឹងចាត់វិធានការម៉ឺងម៉ាត់ជាទីបំផុត ដើម្បីទប់ទល់ការចង់បានឯករាជ្យឱ្យ​តៃវ៉ាន់ ហើយនឹងធានាឱ្យបានថា ផែនការបែបនោះ នឹងគ្មានថ្ងៃទទួលជោគជ័យឡើយ។ ពួកយើង មានភាពជឿជាក់ខ្ពស់ លើសមត្ថភាពខ្លួន ដើម្បីទប់ស្កាត់ចលនាឯករាជ្យតៃវ៉ាន់»។ លោក Dong ក៏បានចោទប្រកាន់ក្រុមប្រទេសមហាអំណាច អំពីការជ្រែកជ្រែកបញ្ហាផ្ទៃក្នុង និង​ការលើកទឹកចិត្តដល់ចលនាបំបែករដ្ឋតៃវ៉ាន់ ផងដែរ។ ពាក់ព័ន្ធការលក់អាវុធរបស់សហរដ្ឋអាមេរិកឱ្យតៃវ៉ាន់ លោក Dong បានហៅវាថា គឺជាការធ្វើតេស្តមួយ ចំពោះខ្សែបន្ទាត់ក្រហមរបស់ចិន។

គួរបញ្ជាក់ថា ចិនចាត់ទុកតៃវ៉ាន់គឺជាផ្នែកមិនអាចកាត់ផ្តាច់បានឡើយ នៃទឹកដីរបស់ខ្លួន បើទោះបីជាទីក្រុងតៃប៉ិ បដិសេធយ៉ាងណាក៏ដោយ ហើយកាលពីខែឧសភាកន្លងទៅ ទីក្រុងប៉េកាំងបានធ្វើសមយុទ្ធយោធា ឡោមព័ទ្ធដែនកោះនេះ ក្រោយការស្បថចូលកាន់តំណែងរបស់ លោក Lai Ching-te ជាមេដឹកនាំតៃវ៉ាន់ថ្មី ដែលចិនហៅថា ជាបុគ្គលមាននិន្នាការចង់បំបែករដ្ឋដ៏គ្រោះថ្នាក់ម្នាក់៕