(បាសេឡូណា)៖ ប្រទេសអេស្បាញ នៅថ្ងៃពុធនេះបានរៀបចំកិច្ចប្រជុំដ៏សំខាន់មួយ ជាមួយគណៈកម្មាធិការរដ្ឋមន្ត្រីការបរទេសនៃប្រទេសអារ៉ាប់ និងប្រទេសអ៊ីស្លាមសម្រាប់តំបន់ហ្គាហ្សា ក្នុងទីក្រុងម៉ាឌ្រីត ការជួបជុំនេះធ្វើឡើងបន្ទាប់ពីប្រទេសអេស្ប៉ាញ អៀរឡង់ និងន័រវែសទទួលស្គាល់ជាផ្លូវការនូវរដ្ឋប៉ាឡេស្ទីន ដែលត្រូវបានកោតសរសើរដោយមេដឹកនាំប៉ាឡេស្ទីន ប៉ុន្តែត្រូវបានថ្កោលទោសដោយអ៊ីស្រាអែល។ នេះបើយោងតាមការចេញផ្សាយដោយ សារព័ត៌មាន Arab News។

ក្នុងកិច្ចប្រជុំគេឃើញឥស្សរជនសំខាន់ៗ ដូចជារដ្ឋមន្ត្រីការបរទេសអារ៉ាប៊ីសាអូឌីត ព្រះអង្គម្ចាស់ Faisal bin Farhan និងនាយករដ្ឋមន្ត្រីកាតា Sheikh Mohammed bin Abdul Rahman Al Thani ក៏ដូចជារដ្ឋមន្ត្រីការបរទេសនៃប្រទេសតួកគី និងហ្ស៊កដានី ដែលសុទ្ធតែជាផ្នែកនៃ គណៈកម្មាធិការ​រដ្ឋមន្ត្រី​ការបរទេស​នៃ​ប្រទេស​អារ៉ាប់ និង​ប្រទេស​អ៊ីស្លាម​សម្រាប់​តំបន់ហ្គាហ្សា។

លោក Mustafa បានសម្តែងការដឹងគុណ ក្នុងនាមប្រធានាធិបតី Mahmoud Abbas និងប្រជាជនប៉ាឡេស្ទីន ទៅចំពោះការទទួលស្គាល់របស់ប្រទេសអេស្ប៉ាញ។

គួរបញ្ជាក់ថា ជាមួយនឹងការទទួលដោយប្រទេសអេស្ប៉ាញ និងអៀរឡង់កាលពីពេលថ្មីៗ ឥឡូវនេះមានសមាជិកចំនួន៩ហើយ នៃសហភាពអឺរ៉ុបចំនួន ២៧ ដែលទទួលស្គាល់ជាផ្លូវការចំពោះភាពរដ្ឋប៉ាឡេស្ទីន។

ការទទួលស្គាល់នេះបាននាំឱ្យមានភាពតានតឹងរវាងសហភាពអឺរ៉ុប និងអ៊ីស្រាអែល ខណៈដែលប្រទេសអេស្ប៉ាញ និងអៀរឡង់បានអំពាវនាវឱ្យមានចំណាត់ការរបស់សហភាពអឺរ៉ុបប្រឆាំងនឹងប្រតិបត្តិការយោធាអ៊ីស្រាអែលដែលកំពុងបន្តនៅក្នុងតំបន់ហ្គាហ្សា។ ការផ្លាស់ប្តូរការទូត កើតឡើងចំពេលមានការវាយលុកដ៏យូររបស់អ៊ីស្រាអែលទៅលើតំបន់ហ្គាហ្សា បន្ទាប់ពីការវាយប្រហាររបស់ពួកហាម៉ាស់កាលពីថ្ងៃទី ៧ ខែតុលា ដែលនាំឱ្យភាគីទាំងសងខាងបាត់បង់យ៉ាងធ្ងន់ធ្ងរ។

ចំណែកប្រទេសស្លូវេនី ក៏គ្រោងនឹងសម្រេចចិត្តលើការទទួលស្គាល់ប៉ាឡេស្ទីនផងដែរ ដែលអាចនាំឱ្យមានការបង្កើនការគាំទ្ររបស់សហភាពអឺរ៉ុបសម្រាប់ភាពជារដ្ឋប៉ាឡេស្ទីន។ វិធានការរបស់អេស្ប៉ាញ អៀរឡង់ និងន័រវេស ត្រូវបានគេមើលឃើញថា ជាជ័យជម្នះផ្នែកការទូតសម្រាប់ប៉ាឡេស្ទីន ហើយអាចមានឥទ្ធិពលលើប្រទេសលោកខាងលិចផ្សេងទៀត៕