(តៃប៉ិ)៖ មេដឹកនាំតៃវ៉ាន់ថ្មី លោក Lai Ching-te បានសម្តែងការអរគុណចំពោះក្រុមពីឡុតតៃវ៉ាន់ ដែលបានបំពេញប្រតិបត្តិការហោះហើរ​ល្បាតដែនអាកាស យ៉ាងស្វាហាប់ កាលពីសប្តាហ៍កន្លងទៅ អំឡុងពេលចិនធ្វើសមយុទ្ធយោធា ឡោមព័ទ្ធជុំវិញដែនកោះនេះ។ នេះបើតាម ការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី២៨ ខែឧសភា ឆ្នាំ២០២៤។

កាលពីថ្ងៃព្រហស្បតិ៍សប្តាហ៍មុន ចិនបានចាប់ផ្តើមការធ្វើសមយុទ្ធយោធា មានរយៈពេលសរុប២ថ្ងៃ ដែលខ្លួនអះអាងថា មានគោលដៅដើម្បី​ជាសារព្រមានដ៏ធ្ងន់មួយ ចំពោះលោក Lai ដែលបានស្បថចូលកាន់តំណែង នាដើមសប្តាហ៍ដដែលនោះ។ ក្នុងឱកាសធ្វើទស្សនកិច្ចទៅកាន់ មូលដ្ឋានទ័ពអាកាស Hualien នៅបណ្តោយឆ្នេរភាគខាងកើត ដែលជាកន្លែងឈរជើង នៃយន្តហោះចម្បាំងទំនើបបំផុតរបស់តៃវ៉ាន់គឺ F-16V លោក Lai បានទទួលទានអាហារពេលថ្ងៃត្រង់ ជាមួយនឹងក្រុមពីឡុតតៃវ៉ាន់ ដែលបានបំពេញប្រតិបត្តិការហោះល្បាតដែនអាកាស អំឡុងសមយុទ្ធយោធារបស់ចិន។

លោក Lai បាននិយាយដូច្នេះថា «ខ្ញុំសូមអរគុណចំពោះអ្នកទាំងអស់គ្នា ដែលនៅប្រចាំការជាប់ ដើម្បីការពារសន្តិសុខជាតិរបស់យើង។ ប៉ុន្មានថ្ងៃមុននេះ ក្នុងការឆ្លើយតបចំពោះ ការធ្វើសមយុទ្ធយោធារបស់ចិន អ្នករាល់គ្នាពិតជាធ្វើបានល្អ»។ លោក Lai បានឱ្យដឹងថា រូបលោក​ទទួលបានរបាយការណ៍លម្អិត ស្តីពីសកម្មភាពឆ្លើយតបរបស់ក្រុមពីឡុត ព្រមទាំងសមត្ថភាពនៃកងយន្តហោះចម្បាំងរបស់តៃវ៉ាន់។ លោក Lai បានបន្ថែមថា «អ្នកទាំងអស់គ្នា បានឆ្លាស់វេនគ្នា ប្រចាំការជាប់២៤ម៉ោង ដើម្បីត្រៀមបំពេញបេសកកម្មល្បាតដែនអាកាស។ ជាមួយ​ការតាំងចិត្តរឹងមាំ និងជំនាញប្រយុទ្ធយ៉ាងប៉ិនប្រសប់ អ្នកទាំងអស់គ្នា កំពុងប្រើប្រាស់យ៉ាងពេញលេញ នូវសមត្ថភាពយន្តហោះចម្បាំងរបស់យើង ដើម្បីការពារដែនអាកាសយើង»។

គួរបញ្ជាក់ថា បើតាមការអះអាងរបស់ក្រសួងការបរទេសតៃវ៉ាន់ អំឡុងសមយុទ្ធយោធារបស់ទីក្រុងប៉េកាំង យន្តហោះយោធាចិនសរុបជាង ១១០គ្រឿង និងនាវាយោធារាប់សិបគ្រឿង ត្រូវបានបញ្ជូនមកឡោមព័ទ្ធជុំវិញកោះតៃវ៉ាន់។ មកទល់ពេលនេះ តៃវ៉ាន់បាននិងកំពុងកែច្នៃ យន្តហោះចម្បាំង F-16A/B ចំនួន១៤១គ្រឿង ឱ្យទៅជាស៊េរី F-16V ដែលមានលក្ខណៈទំនើបជាងមុន ហើយក៏បានបញ្ជាទិញ F-16V ថ្មីសន្លាងតែម្តង ចំនួន៦៦គ្រឿងផងដែរ ដើម្បីបង្កើនសមត្ថភាពទប់ទល់ជាមួយ កងទ័ពអាកាសរបស់ចិន ដែលរួមមានទាំង យន្តហោះចម្បាំងបំបាំងកាយ J-20៕