(ប៉េកាំង)៖ ប្រព័ន្ធផ្សព្វផ្សាយរដ្ឋរបស់ចិន បានរាយការណ៍កាលពីថ្ងៃអង្គារ ដោយដកស្រង់សម្តីរបស់រដ្ឋមន្ត្រីការបរទេសចិន លោក Wang Yi ថា ប្រទេសនឹងបន្តពង្រឹងកិច្ចសហប្រតិបត្តិការជាយុទ្ធសាស្ត្រជាមួយប្រទេសអ៊ីរ៉ង់ ដោយសង្កត់ធ្ងន់លើសារៈសំខាន់នៃការការពារផលប្រយោជន៍រួម និងការរួមចំណែកដល់សន្តិភាពក្នុងតំបន់ និងពិភពលោក។ នេះបើយោងតាមការចេញផ្សាយដោយ សារព័ត៌មាន Arab News នៅថ្ងៃទី២២​ ខែឧសភា ឆ្នាំ២០២៤។

លោក Wang បានធ្វើការកត់សម្គាល់បែបនេះ ក្នុងជំនួបជាមួយអនុរដ្ឋមន្ត្រីការបរទេសអ៊ីរ៉ង់ លោក Mahdi Safari ក្នុងកិច្ចប្រជុំរបស់អង្គការសហប្រតិបត្តិការសៀងហៃ (SCO) នៅទីក្រុង Astana ប្រទេសកាហ្សាក់ស្ថាន។

ក្នុងអំឡុងកិច្ចពិភាក្សា លោក Wang Yi ក៏បានសម្តែងការសោកស្តាយចំពោះមរណភាព របស់ប្រធានាធិបតីអ៊ីរ៉ង់ លោក Ebrahim Raisi និងរដ្ឋមន្ត្រីការបរទេស Hossein Amir-Abdollahian កាលពីពេលថ្មីៗនេះផងដែរ។

លោក Wang Yi បានបង្ហាញពីសាមគ្គីភាពរបស់ចិនជាមួយអ៊ីរ៉ង់ ក្នុងអំឡុងពេលនៃការកាន់ទុក្ខនេះដោយបញ្ជាក់ថា «អ៊ីរ៉ង់បានបាត់បង់មេដឹកនាំឆ្នើម ហើយចិនបានបាត់បង់មិត្តល្អ និងដៃគូ។ ក្នុង​គ្រា​ដ៏​លំបាក​នេះ ចិន​ឈរ​យ៉ាង​រឹងមាំ​ជាមួយ​មិត្ត​អ៊ីរ៉ង់»៕