(ម៉ូស្គូ)៖ រុស្ស៊ីបាននិយាយកាលពីថ្ងៃពុធថា ស្ថានការណ៍នៅហ្គាហ្សាកាន់តែអាក្រក់ទៅៗ ដោយសារការចល័តកងទ័ពរបស់អ៊ីស្រាអែលចូលទៅតំបន់ Rafah ហើយទីក្រុងម៉ូស្គូមិនបានឃើញការរំពឹងទុកណាមួយ សម្រាប់សន្តិភាពនៅតំបន់ហ្គាហ្សា ឬមជ្ឈិមបូព៌ានិយាយជារួមនោះទេ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០៨ ខែឧសភា ឆ្នាំ២០២៤។

រុស្ស៊ីតាមរយៈអ្នកនាំពាក្យក្រសួងការបរទេសរបស់ខ្លួន បាននិយាយថា
ការវាយលុកចូលក្នុងទីក្រុង Rafah របស់អ៊ីស្រាអែលដែលជាទីជម្រកចុងក្រោយនៃប្រជាជនប៉ាឡេស្ទីនជា១លាននាក់នោះ ត្រូវបានចាត់ទុកថា ជាកត្តាអស្ថិរភាពបន្ថែមសម្រាប់តំបន់។

លោកស្រី Maria Zakharova បានសង្កត់ធ្ងន់លើតម្រូវការ សម្រាប់ការប្រកាន់ខ្ជាប់នូវច្បាប់មនុស្សធម៌អន្តរជាតិ ដែលបានផ្តល់ឱ្យការប្រមូលផ្តុំជនស៊ីវិលប៉ាឡេស្ទីននៅក្នុងតំបន់។ ទាក់ទងនឹងកិច្ចខិតខំប្រឹងប្រែង សម្រាប់ដំណោះស្រាយយូរអង្វែងនៅមជ្ឈិមបូព៌ា លោកស្រីបានសម្តែងការសង្ស័យដោយបញ្ជាក់ថា ស្ថានការណ៍នៅហ្គាហ្សានៅឆ្ងាយពីការដោះស្រាយ ហើយផ្ទុយទៅវិញកំពុងកើនឡើងជារៀងរាល់ថ្ងៃ។

អ្នកនាំពាក្យរូបនេះបានលើកឡើងយ៉ាងដូច្នេះថា «មិនមានការរំពឹងទុកសម្រាប់ការដោះស្រាយស្ថានការណ៍នៅតំបន់ហ្គាហ្សាស្ទ្រីបទេ។ ផ្ទុយទៅវិញ ស្ថានភាពនៅក្នុងតំបន់ ជម្លោះកំពុងកើនឡើងជារៀងរាល់ថ្ងៃ»។

គួរជម្រាបថា សង្រ្គាមបានចាប់ផ្តើម នៅពេលដែលពួកយុទ្ធជនហាម៉ាស់ បានវាយប្រហារអ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្សប្រហែល ១,២០០ នាក់និងចាប់ពង្រត់ប្រហែល ២៥០នាក់ ដែលក្នុងនោះ ១៣៣នាក់ នៅបន្តជាប់ជាចំណាប់ខ្មាំងនៅក្នុងតំបន់ហ្គាហ្សា។ ក្រសួង​សុខាភិបាល​ហ្កាហ្សា​បាន​និយាយ​ថា ការ​សងសឹក​របស់​អ៊ីស្រាអែល​បាន​សម្លាប់​ប្រជាជន​ប៉ាឡេស្ទីន​ជិត ៣៥,០០០ នាក់ ដែល​ភាគ​ច្រើន​ជា​ជនស៊ីវិល​៕