(ប្រាស៉ីលីយ៉ា)៖ អាជ្ញាធរប្រេស៉ីល បានឱ្យដឹងកាលពីយប់ថ្ងៃព្រហស្បតិ៍សប្តាហ៍នេះថា ភ្លៀងធ្លាក់ខ្លាំងក្នុងសប្តាហ៍នេះ នៅរដ្ឋ Rio Grande do Sul ភាគខាងត្បូងប្រទេស បានផ្តាច់ជីវិតមនុស្សយ៉ាងហោច២៩នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី៣ ខែឧសភា ឆ្នាំ២០២៤។

ព្យុះភ្លៀងខាងលើដែលបង្កឱ្យមានគ្រោះទឹកជំនន់ និងគ្រោះបំណាក់ដីធ្ងន់ធ្ងរ ក៏បានធ្វើឱ្យមនុស្សសរុប៦០នាក់ បាត់ខ្លួនផងដែរ ហើយប្រមាណ​១០,២៤២នាក់ ត្រូវបង្ខំឱ្យភៀសខ្លួនពីផ្ទះសម្បែង នៅតាមទីក្រុងសរុប១៥៤។ អភិបាលរដ្ឋ Rio Grande do Sul លោក Eduardo Leite បាននិយាយថា ស្ថានការណ៍ឆ្នាំនេះ មានសភាពអាក្រក់ខ្លាំងជាងការធ្លាក់ភ្លៀងខ្លាំងនៅក្នុងរដ្ឋ កាលពីឆ្នាំមុនទៅទៀត។ ជាមួយគ្នានេះ មនុស្សជាង​៣០០,០០០នាក់ ត្រូវគ្មានអគ្គិសនីប្រើប្រាស់ បន្ទាប់ពីទំនប់វារីអគ្គិសនីតូចមួយ បានលេចធ្លាយ។

គួរបញ្ជាក់ថា ក្នុងពេលប៉ុន្មានឆ្នាំចុងក្រោយ ប្រទេសអាមេរិកឡាទីនមួយនេះ បានជួបប្រទះគ្រោះមហន្តរាយធម្មតជាតិ ជាបន្តបន្ទាប់ តួយ៉ាង​កាលពីឆ្នាំមុន មនុស្សជាង៥០នាក់ បានស្លាប់នៅរដ្ឋ Sao Paulo ក្រោយការធ្លាក់ភ្លៀងខ្លាំង បានបង្កជាគ្រោះរអិលបាក់ដី និងទឹកជំនន់។ រីឯកាលពីឆ្នាំដដែលនោះ ព្យុះស៉ីក្លូនបានផ្តាច់ជីវិត មនុស្សជាង៣០នាក់ នៅរដ្ឋ Rio Grande do Sul៕