(ឌូប៉ៃ)៖ យោងតាមប្រភពព័ត៌មាន បានឲ្យដឹងថា សហរដ្ឋអាមេរិក ចក្រភពអង់គ្លេស និងសហភាពអឺរ៉ុប កំពុងជំរុញឱ្យប្រទេសអេមីរ៉ាត់អារ៉ាប់រួម (UAE) បង្ហាញការប្តេជ្ញាចិត្តរបស់ខ្លួន ក្នុងការអនុវត្តការដាក់ទណ្ឌកម្ម លើប្រទេសរុស្ស៊ី ជុំវិញជម្លោះក្នុងប្រទេសអ៊ុយក្រែន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០១ ខែឧសភា ឆ្នាំ២០២៤។

អ្នកនាំពាក្យរបស់ក្រសួងការបរទេសបាននិយាយថា មន្ត្រីសហរដ្ឋអាមេរិក អង់គ្លេស និងសហភាពអឺរ៉ុបបានទៅទស្សនកិច្ចប្រទេសឈូងសមុទ្រអេមីរ៉ាត់អារ៉ាប់រួម (UAE) កាលពីសប្តាហ៍មុន ដែលជាផ្នែកនៃកិច្ចខិតខំប្រឹងប្រែងសម្របសម្រួលកាន់តែទូលំទូលាយដើម្បីការពារទំនិញដាក់ទណ្ឌកម្ម មិនឱ្យចូលដល់ប្រទេសរុស្ស៊ី ប៉ុន្តែលោកបានបដិសេធមិនធ្វើអត្ថាធិប្បាយបន្ថែមនោះទេ។

ប្រភពបាននិយាយថា ក្រុមមន្ត្រីបានស្នើឱ្យ UAE នៅក្នុងកិច្ចប្រជុំដាច់ដោយឡែកជាបន្តបន្ទាប់ ដើម្បីចែករំលែកព័ត៌មានពាណិជ្ជកម្មលម្អិត ស្តីពីការនាំចេញរបស់ខ្លួនទៅកាន់ប្រទេសរុស្ស៊ី និងការនាំចេញឡើងវិញនូវអ្វីដែលគេហៅថាទំនិញប្រើប្រាស់ពីរមុខងារ សម្រាប់ការប្រើប្រាស់ស៊ីវិលផង និងយោធាផង។

គួរជម្រាបថា ក្តីកង្វល់របស់លោកខាងលិច ផ្តោតលើការចូលរួមរបស់ក្រុមហ៊ុនអេមីរ៉ាត់អារ៉ាប់រួម ក្នុងការនាំចេញរបស់របរដាក់ទណ្ឌកម្មដូចជា បន្ទះសៀគ្វីកុំព្យូទ័រ គ្រឿងអេឡិចត្រូនិច និងគ្រឿងចក្រទៅកាន់ប្រទេសរុស្ស៊ី ដែលអាចជួយដល់ប្រតិបត្តិការយោធារបស់ទីក្រុងម៉ូស្គូប្រឆាំងនឹងអ៊ុយក្រែន។

ការនាំចូលរបស់ UAE នៃផលិតផលប្រើប្រាស់ពីរមុខងារ ដែលត្រូវបានដាក់ទណ្ឌកម្ម ត្រូវបានគេរាយការណ៍ថាបានកើនឡើងចាប់តាំងពីការដាក់ទណ្ឌកម្មរបស់លោកខាងលិចលើប្រទេសរុស្ស៊ី ជាមួយនឹងទិន្នន័យពាណិជ្ជកម្មរបស់រុស្ស៊ីបង្ហាញថាប្រទេសឈូងសមុទ្រមួយនេះ គឺជាប្រភពនៃការនាំចូលទាំងនេះ ទោះបីជា Reuters មិនអាចផ្ទៀងផ្ទាត់ទិន្នន័យនេះបានភ្លាមៗក៏ដោយ៕