(បាងកក)៖ នៅថ្ងៃពុធនេះ តុលាការធម្មនុញ្ញនៃប្រទេសថៃ បានសម្រេចយល់ព្រមទទួលយកសំណុំរឿងមួយ ដែលទាមទារឱ្យរំលាយគណបក្សប្រឆាំង Move Forward ជុំវិញកិច្ចប្រឹងប្រែងរបស់បក្សនយោបាយនេះ ស្តីពីការចង់ធ្វើកំណែទម្រង់ ច្បាប់ការពារស្ថាប័នព្រះមហាក្សត្រដ៏មានឥទ្ធិពល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី៣ ខែមេសា ឆ្នាំ២០២៤។

កាលពីខែមីនាកន្លងទៅនេះ គណៈកម្មការរៀបចំការបោះឆ្នោតថៃ បានឯកភាពគ្នាជាឯកច្ឆន្ទ ក្នុងការដាក់សំណើទៅកាន់តុលាការធម្មនុញ្ញ ឱ្យរំលាយគណបក្ស Move Forward ដោយសារតែរឿងចង់កែប្រែច្បាប់ការពារប្រឆាំង ការប្រមាថស្ថាប័នព្រះមហាក្សត្រ ដែលមាន​លក្ខណៈតឹងរ៉ឹងខ្លាំង។ នៅក្នុងសេចក្តីថ្លែងការណ៍នាថ្ងៃពុធនេះ តុលាការធម្មនុញ្ញ បានប្រកាសថា ខ្លួនសម្រេចទទួលយក​សំណើនោះ ដើម្បីធ្វើការកាត់សេចក្តី ហើយទុកពេលឱ្យគណបក្ស Move Forward ១៥ថ្ងៃ ដើម្បីបង្ហាញភស្តុតាងពាក់ព័ន្ធផ្សេងៗ។

វាកើតមានឡើងក្រោយការសម្រេចមួយផ្សេងទៀត កាលពីខែមករា ដើមឆ្នាំនេះ របស់តុលាការធម្មនុញ្ញថៃ ដែលកំណត់ថា កិច្ចប្រឹងប្រែង់របស់គណបក្ស Move Forward ពាក់ព័ន្ធច្បាប់ការពារស្ថាប័នព្រះមហាក្សត្រ គឺស្មើទៅនឹងសកម្មភាពប៉ុនប៉ងផ្តួលរំលំ របបរាជានិយមអាស្រ័យរដ្ឋធម្មនុញ្ញរបស់​ប្រទេសថៃ។ ទោះបីឈ្នះបានអាសនៈច្រើនជាងគេ ក្នុងការបោះឆ្នោតសកលកាលពីឆ្នាំមុនក៏ដោយ Move Forward មិនត្រូវបានអនុញ្ញាត​ឱ្យចូលរួមក្រុមចម្រុះ ដែលបានបង្កើតរដ្ឋាភិបាលថៃបច្ចុប្បន្នឡើយ ហើយអតីតមេដឹកនាំ របស់បក្សនេះ គឺលោក Pita Limjaroenrat ត្រូវបាន​រារាំងមិនឱ្យទទួលបានសំឡេងគ្រប់គ្រាន់ ដើម្បីអាចក្លាយជានាយករដ្ឋមន្រ្តី។

គួរបញ្ជាក់ថា គណបក្សនយោបាយជំនាន់មុនរបស់ Move Forward គឺបក្ស Future Forward ដែលមានគោលនយោបាយស្រដៀងគ្នា ក៏ធ្លាប់ត្រូវបានតុលាការធម្មនុញ្ញថៃ សម្រេចរំលាយចោល កាលពីឆ្នាំ២០២០ម្តងរួចទៅហើយដែរ ដោយសារល្មើសគោលការណ៍ច្បាប់ឃោសនាបោះឆ្នោត៕