(សិង្ហបុរី)៖ នៅថ្ងៃចន្ទនេះ រដ្ឋមន្រ្តីយុត្តិធម៌និងមហាផ្ទៃនៃប្រទេសសិង្ហបុរី លោក K Shanmugan បានឱ្យដឹងថា រដ្ឋាភិបាលសិង្ហបុរី ទើបតែបានបង្គាប់ឱ្យ ស្ថានទូតអ៉ីស្រាអែលប្រចាំនៅសិង្ហបុរី លុបចោលវិញជាបន្ទាន់ នូវការបង្ហោះសារមួយលើ Facebook ដែលមិនអាច​ទទួលយកបានដាច់ខាត ពាក់ព័ន្ធប៉ាឡេស្ទីន។ នេះបើតាមការចេញផ្សាយដោយ ទីភ្នាក់ងារព័ត៌មាន CNA នាថ្ងៃចន្ទ ទី២៥ ខែមីនា ឆ្នាំ២០២៤។

កាលពីថ្ងៃអាទិត្យ ទី២៤ ខែមីនា គណនី Facebook ផ្លូវការរបស់ស្ថានទូតសិង្ហបុរី បានបង្ហោះសារមួយដែលអះអាងនូវ ការលើកឡើងអំពី​អ៉ីស្រាអែលនិងប៉ាឡេស្ទីន ក្នុងគម្ពីរកូអាន (Quran)។ សារនោះបានសរសេរយ៉ាងដូច្នេះថា «មានការលើកឡើងអំពីអ៉ីស្រាអែល៤៣លើក នៅក្នុងគម្ពីរកូអាន។ ដោយឡែក គ្មានការលើកឡើងអំពីប៉ាឡេស្ទីន សូម្បីតែម្តង។ ភស្តុតាងផ្នែកបុរាណវិទ្យាទាំងអស់ ដូចជាផែនទី ឯកសារ និងកាក់ជាដើម សុទ្ធតែបង្ហាញថា ជនជាតិជ្វីហ្វគឺជាជនជាតិដើម នៅលើទឹកដីនេះ»។ សារ Facebook ដដែលនោះ ត្រូវបានលុបចោលវិញ ក្នុងថ្ងៃដដែល។

លោក K Shanmugan បានប្រាប់ក្រុមអ្នកសារព័ត៌មាននៅថ្ងៃចន្ទនេះថា លោកមានការមិនពេញចិត្តជាខ្លាំង ពេលបានដឹងអំពីការបង្ហោះសារខាងលើ។ លោកបានបន្តថា ក្រសួងមហាផ្ទៃសិង្ហបុរី បានជូនដំណឹងទៅកាន់ក្រសួងការបរទេសសិង្ហបុរី ហើយខាងក្រសួងការបរទេសក៏បានប្រាប់បន្ត ទៅកាន់ស្ថានទូតអ៉ីស្រាអែលថា ការបង្ហោះសារលើ Facebook នោះ ត្រូវតែលុបចោល​វិញជាបន្ទាន់។

លោក K Shanmugan បានលើកហេតុផលថា ការបង្ហោះសារខាងលើគឺខុសធ្ងន់ណាស់ ដោយទីមួយគឺវាគ្មានការគិតគូរវែងឆ្ងាយ និង​មិនសមរម្យ ហើយទីពីរគឺវាអាចបង្កហានិភ័យចំពោះសុវត្ថិភាព សន្តិសុខ និងភាពសុខដុមរមនានៃប្រទេសសិង្ហបុរី។ លោករដ្ឋមន្រ្តីសិង្ហបុរី បានបន្ថែមដូច្នេះថា «យើងមើលថែសុវត្ថិភាពរបស់មនុស្សគ្រប់គ្នានៅសិង្ហបុរី ទាំងជនជាតិភាគច្រើននិងជនជាតិភាគតិច រួមមានទាំងជ្វីហ្វ និងមូស្លីម»។ ជាចុងក្រោយ លោក K Shanmugan បានសង្កត់ធ្ងន់ថា ការបង្ហោះសារដូចខាងលើនេះ អាចនឹងដុតបញ្ឆេះភាពតានតឹង ហើយអាចធ្វើឱ្យសហគមន៍ជនជាតិជ្វីហ្វ ស្ថិតក្រោមហានិភ័យ៕