(វែលីនតោន)៖ រដ្ឋមន្រ្តីការបរទេសនៃប្រទេសនូវែលសេឡង់ បានឱ្យដឹងនៅថ្ងៃអង្គារនេះថា នាយករដ្ឋមន្រ្តីនូវែលសេឡង់ លោក Christopher Luxon មានគម្រោងបំពេញទស្សនកិច្ចជាលើកដំបូង ទៅកាន់ប្រទេសចិន ក្នុងនាមជានាយករដ្ឋមន្រ្តី បន្ទាប់ពីជំនួបជាមួយ​ប្រមុខការទូតរបស់ទីក្រុងប៉េកាំង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី១៩ ខែមីនា ឆ្នាំ២០២៤។

រដ្ឋមន្រ្តីការបរទេសចិន លោក Wang Yi បានមកបំពេញទស្សនកិច្ចនៅនូវែលសេឡង់ កាលពីថ្ងៃចន្ទសប្តាហ៍នេះ ហើយបានជួបពិភាក្សាគ្នា​ជាមួយលោក ​Luxon ព្រមទាំងជាមួយរដ្ឋមន្រ្តីការបរទេសនូវែលសេឡង់ លោក Winston Peters និងរដ្ឋមន្រ្តីពាណិជ្ជកម្មនូវែលសេឡង់ លោក Todd McClay។ លោក Peters បានប្រាប់ក្រុមអ្នកសារព័ត៌មានថា រូបលោកផ្ទាល់ រួមជាមួយលោក Luxon និងលោក McClay ត្រូវបានអញ្ជើញឱ្យទៅបំពេញទស្សនកិច្ច នៅឯប្រទេសចិន ប៉ុន្តែកាលបរិច្ឆេទមិនទាន់ត្រូវបានកំណត់នៅឡើយទេ។

គួរបញ្ជាក់ថា វានឹងជាដំណើរទស្សនកិច្ចលើកដំបូងបំផុតរបស់លោក Luxon ទៅកាន់ប្រទេសចិន គិតចាប់តាំងពីឡើងកាន់អំណាចជា​នាយករដ្ឋមន្រ្តីនូវែលសេឡង់ កាលពីខែតុលា ឆ្នាំ២០២៣។ ប្រទេសនូវែលសេឡង់ ស្ថិតក្នុងសម្ព័ន្ធភាពចែករំលែកព័ត៌មានសម្ងាត់មួយ ហៅថា Five Eyes ជាមួយសហរដ្ឋអាមេរិក កាណាដា ចក្រភពអង់គ្លេស និងអូស្រ្តាលី។ យ៉ាងណាមិញ ទីក្រុងវែលីងតោន បានរងការរិះគន់ ដោយសារតែប្រកាន់ជំហរមិនសូវរឹងមាំ​ចំពោះចិន ដោយផ្តោតអាទិភាពទៅលើទំនាក់ទំនងពាណិជ្ជកម្មរបស់ខ្លួន ខ្ពស់ជាងក្តីកង្វល់អំពីបញ្ហាសន្តិសុខរបស់សម្ព័ន្ធមិត្ត។ ចិនគឺជាប្រទេស​ដៃគូពាណិជ្ជកម្មធំបំផុតរបស់នូវែលសេឡង់។ ដោយឡែក ក្នុងសប្តាហ៍នេះ លោក Wang ក៏នឹងត្រូវបន្តទៅបំពេញទស្សនកិច្ច នៅទីក្រុងកង់បេរ៉ានៃប្រទេសអូស្រ្តាលី ផងដែរ៕