(នីញ៉ាម៉េ)៖ អ្នកនាំពាក្យរបបសឹកនៅនេហ្សេ បានឱ្យដឹងកាលពីថ្ងៃសៅរ៍សប្តាហ៍នេះថា រដ្ឋាភិបាលយោធានៃប្រទេសអាហ្រ្វិកមួយនេះ បានសម្រេចលុបចោលវិញ នូវ​កិច្ចព្រមព្រៀងយោធាមួយ ដែលអនុញ្ញាតឱ្យកងទ័ព ព្រមទាំងមន្រ្តីស៉ីវិលមកពីក្រសួងការពារជាតិ​របស់សហរដ្ឋអាមេរិក អាចស្ថិតនៅក្នុងទឹកដីរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១៧ ខែមីនា ឆ្នាំ២០២៤។

ការសម្រេចចិត្តខាងលើធ្វើឡើង ក្រោយការបំពេញទស្សនកិច្ចក្នុងសប្តាហ៍នេះរបស់ក្រុមមន្រ្តីអាមេរិក ដឹកនាំដោយឧបការីរដ្ឋមន្រ្តីការបរទេសអាមេរិក ទទួលបន្ទុកកិច្ចការតំបន់អាហ្រ្វិក លោកស្រី Molly Phee ហើយក្នុងនោះរួមមានទាំងលោកឧត្តមសេនីយ៍ Michael Langley ដែលជា​មេបញ្ជាការនៃបញ្ជាការដ្ឋានយោធាអាមេរិក ប្រចាំតំបន់អាហ្រ្វិក ផងដែរ។

ចាប់តាំងពីដណ្តើមអំណាចកាលពីខែកក្កដា ឆ្នាំមុនមក របបសឹកនីហ្សេ ដែលដូចទៅនឹងរដ្ឋាភិបាលយោធា នៅប្រទេសជិតខាង២ទៀតដែរ នោះគឺម៉ាលីនិងបួគីណាហ្វាសូ បានបណ្តេញបារាំងក៏ដូចជាកងកម្លាំងអឺរ៉ុបដទៃទៀត ចេញពីប្រទេសរបស់ខ្លួន ហើយងាកទៅរកការគាំទ្រពី​សំណាក់ប្រទេសរុស្ស៉ីវិញ។

គួរបញ្ជាក់ថា គិតត្រឹមឆ្នាំ២០២៣ អាមេរិកមានកងទ័ពប្រហែល១,១០០នាក់ ឈរជើងនៅប្រទេសនីហ្សេ ហើយយោធាអាមេរិកធ្វើប្រតិបត្តិការ ចេញពីមូលដ្ឋានចំនួន២ ក្នុងនោះរួមមានទាំងមូលដ្ឋានយន្តហោះដ្រូន គេស្គាល់ថា Air Base 201។ រដ្ឋាភិបាលយោធា​របស់នីហ្សេ បាននិយាយថា វត្តមានកងទ័ពអាមេរិកនៅប្រទេសរបស់ខ្លួន គឺជារឿងខុសច្បាប់ ហើយបំពានរដ្ឋធម្មនុញ្ញ និងគោលការណ៍ប្រជាធិបតេយ្យ៕