(មូស្គូ)៖ អ៊ុយក្រែននៅថ្ងៃពុធទី១៣ ខែមីនានេះ បានបើកការវាយប្រហារដោយយន្តហោះដ្រូនគ្មានមនុស្សបើកទ្រង់ទ្រាយធំលើ​ប្រទេសរុស្ស៊ីដោយបង្កឱ្យមានភ្លើង​ឆេះរោងចក្រចម្រាញ់​ប្រេងដ៏ធំបំផុតមួយ​របស់រុស្ស៉ី ក្នុង​អ្វី​ដែល​លោក​ប្រធានាធិបតី Vladimir Putin បាន​និយាយ​ថា ​ជា​ការ​ប៉ុនប៉ង​រំខាន​ដល់​ការ​បោះឆ្នោត​ប្រធានាធិបតី​រុស្ស៊ី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី១៣ ខែមីនា ឆ្នាំ២០២៤។

រុស្ស៊ី និងអ៊ុយក្រែនបានប្រើប្រាស់យន្តហោះដ្រូន ដើម្បីវាយប្រហារលើហេដ្ឋារចនាសម្ព័ន្ធសំខាន់ៗគ្នាទៅវិញទៅមក នៅក្នុងសង្គ្រាមជាងពីរឆ្នាំរបស់ពួកគេ។ ហើយនៅក្នុងប៉ុន្មានខែថ្មីៗនេះ ទីក្រុងគៀវបានវាយប្រហារលើរោងចក្រចម្រាញ់ប្រេង និងកន្លែងថាមពលរបស់រុស្ស៊ី។

មួយថ្ងៃបន្ទាប់ពីបានបង្កការខូចខាតយ៉ាងធ្ងន់ធ្ងរដល់រោងចក្រចម្រាញ់ប្រេង NORSI របស់ក្រុមហ៊ុន Lukoil
យន្តហោះគ្មានមនុស្សបើករបស់អ៊ុយក្រែន ក៏បានវាយប្រហារទៅលើរោងចក្រចម្រាញ់ប្រេង Ryazan
​របស់ក្រុមហ៊ុន Rosneft ដែលជារោងចក្រចម្រាញ់ប្រេងដ៏ធំបំផុតទីប្រាំពីរ នៅក្នុងប្រទេសរុស្ស៊ីដែលមានចម្ងាយ ១៨០ គីឡូម៉ែត្រពីទីក្រុងម៉ូស្គូ។

ប្រព័ន្ធផ្សព្វផ្សាយរុស្ស៊ី​បាននិយាយថា ត្រឹមតែប៉ុន្មានម៉ោងប៉ុណ្ណោះយន្តហោះគ្មានមនុស្សបើកប្រមាណ៦០គ្រឿង​ត្រូវបានបំផ្លាញលើដែន​អធិបតេយ្យភាព​រុស្ស៊ី។

លោក Pavel Markov អភិបាលនៃតំបន់ Ryazan ដែលមានព្រំប្រទល់ជាប់តំបន់មូស្គូភាគខាងជើង បាននិយាយនៅលើកម្មវិធីផ្ញើសារ Telegram ថា «រោងចក្រចម្រាញ់ប្រេង Ryazan ត្រូវបានវាយប្រហារដោយយន្តហោះគ្មានមនុស្សបើក»។ លោក​បាន​បន្ថែមដោយ​មិន​បាន​បញ្ជាក់​លម្អិត​ថា «​អគ្គិភ័យ​បាន​ឆាបឆេះ​ ហើយ​បើ​តាម​ព័ត៌មាន​បឋម​មាន​អ្នក​របួស»។

ទីភ្នាក់ងារសារព័ត៌មានរដ្ឋរុស្ស៊ី RIA បាននិយាយថា យន្តហោះគ្មានមនុស្សបើករបស់អ៊ុយក្រែនចំនួន ៤ គ្រឿង បានវាយប្រហាររោងចក្រកាលពីព្រឹកព្រលឹម បណ្តាលឱ្យមានភ្លើងឆេះទំហំ ១៧៥ ម៉ែត្រការ៉េ។ ភ្លើងត្រូវបានពន្លត់​ប៉ុន្មានម៉ោងក្រោយមក។ វាមិនទាន់ដឹងច្បាស់ថាតើវានឹងមានឥទ្ធិពលអ្វីមកលើចង្វាក់ផលិតកម្ម​នោះទេ។

ខ្សែវីដេអូដែលមិនបានផ្ទៀងផ្ទាត់ ដែលត្រូវបានបង្ហោះនៅលើប្រព័ន្ធផ្សព្វផ្សាយសង្គម បានបង្ហាញពីផ្សែងខ្មៅហោះឡើងពីលើអណ្តាតភ្លើង នៅឯរោងចក្រ Ryazan ដែលចម្រាញ់ប្រេងប្រហែល ១២.៧ លានតោនក្នុងមួយឆ្នាំ ឬ ៤.៦ ភាគរយនៃចំនួនសរុបរបស់រុស្ស៊ី នេះបើយោងតាមប្រភពឧស្សាហកម្ម៕