(ប៉េកាំង)៖ ថ្លែងក្នុងសន្និសីទសារព័ត៌មានមួយ នៅទីក្រុងប៉េកាំងនាថ្ងៃព្រហស្បតិ៍នេះ រដ្ឋមន្រ្តីការបរទេសចិន លោក វ៉ាង យី (Wang Yi) បាននិយាយថា ចិននឹងដើរតួនាទីជា កម្លាំងដឹកនាំដើម្បីសន្តិភាព ក៏ដូចជាស្ថិរភាពរបស់ពិភពលោក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី៧ ខែមីនា ឆ្នាំ២០២៤។

លោក Wang បានលើកឡើងយ៉ាងដូច្នេះថា «នៅចំពោះមុខវិបត្តិស្មុគស្មាញជុំវិញពិភពលោក ចិននឹងបន្តព្យាយាមដើរតួនាទីធ្វើជា​កម្លាំងដឹកនាំមួយសម្រាប់សន្តិភាព ស្ថិរភាព និងវឌ្ឍនភាពសកល»។ លោក Wang បានបន្តថា «យើងប្រឆាំងដាច់ខាតចំពោះអនុត្តរភាព និងការធ្វើទុក្ខបុកម្នេញគ្រប់សកម្មភាពទាំងអស់ ហើយនឹងរក្សាការពារយ៉ាងរឹងមាំ នូវអធិបតេយ្យ សន្តិសុខ និងផលប្រយោជន៍អភិវឌ្ឍន៍ជាតិ»។

ការអត្ថាធិប្បាយដូចខាងលើ របស់លោក Wang ធ្វើឡើង នៅក្រៅមហាសន្និបាតប្រចាំឆ្នាំនៃសភាចិនទាំង២ ដែលបានចាប់ផ្តើមកាលពី​ថ្ងៃចន្ទដើមសប្តាហ៍នេះ។ វាគឺជាឱកាសកម្រមួយ ដែលអនុញ្ញាតឱ្យពិភពលោក អាចក្រឡេកមើលយុទ្ធសាស្រ្តរបស់រដ្ឋាភិបាលចិន សម្រាប់រយៈពេល​១ឆ្នាំខាងមុខ។ មហាសន្និបាតសភាចិនឆ្នាំនេះ កំពុងស្ថិតក្រោមការតាមដានជាពិសេស សម្រាប់សញ្ញានៃភាពជឿជាក់របស់ថ្នាក់ដឹកនាំចិន នៅក្នុងស្ថានភាពភូមិសាស្រ្តនយោបាយបច្ចុប្បន្ន ស្របពេលដែលភាពតានតឹងនៅតែបន្ត ពាក់ព័ន្ធបញ្ហាកោះតៃវ៉ាន់ និងសមុទ្រចិនខាងត្បូង បូករួមទាំងវិបត្តិសង្រ្គាមនៅអ៊ុយក្រែន និងតំបន់ហ្កាហ្សា៕

រូបភាពពី Reuters