(ប៉េកាំង)៖ ឆ្មាំសមុទ្រចិននាថ្ងៃអាទិត្យនេះ បាននិយាយថា ខ្លួននឹងពង្រឹងសកម្មភាពអនុវត្តច្បាប់ ហើយធ្វើការល្បាតជាប់ជាប្រចាំ នៅជុំវិញ​ទីប្រជុំកោះដែលគ្រប់គ្រងដោយតៃវ៉ាន់ កៀកនឹងឆ្នេរសមុទ្ររបស់ប្រទេសចិន ខណៈភាពតានតឹងរវាងភាគីទាំងពីរបានកើនឡើងថែមទៀត ក្រោយមានឧប្បត្តិហេតុដែលបណ្តាលឱ្យ ជនជាតិចិន២នាក់ស្លាប់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១៨ ខែកុម្ភៈ ឆ្នាំ២០២៤។

កាលពីថ្ងៃព្រហស្បតិ៍សប្តាហ៍នេះ តៃវ៉ាន់បាននិយាយការពារសកម្មភាពរបស់ឆ្មាំសមុទ្រខ្លួន បន្ទាប់ពីមនុស្ស២នាក់ នៅលើទូកល្បឿនលឿនចិន១គ្រឿង ដែលជិះមកកៀកកោះរបស់តៃវ៉ាន់ខ្លាំងពេក បានបាត់បង់ជីវិត នៅពេលទូកពួកគេក្រឡាប់លិច បន្ទាប់ពីព្យាយាមរត់គេចពីនាវារបស់​ឆ្មាំសមុទ្រតៃវ៉ាន់។ ប៉ុន្មានឆ្នាំមកនេះ តៃវ៉ាន់បានត្អូញត្អែរអំពីទូកនេសាទនិងយានដទៃទៀតរបស់ចិន ធ្វើប្រតិបត្តិការនៅក្នុងដែនទឹក ដែលស្ថិត​ក្រោមការគ្រប់គ្រងរបស់ខ្លួន ជាពិសេសនៅក្បែរៗទីប្រជុំកោះ Kinmen និង Matsu ដែលនៅកៀកនឹងឆ្នេរសមុទ្ររបស់ប្រទេសចិន។

ចិនបានថ្កោលទោសសកម្មភាពរបស់តៃវ៉ាន់ ខណៈឧប្បត្តិហេតុនោះបានកើតឡើង នៅក្បែរកូនកោះ Beiding នៃទីប្រជុំកោះ Kinmen។ ឆ្មាំសមុទ្រចិនបាននិយាយក្នុងសេចក្តីថ្លែងការណ៍ថា នឹងពង្រឹងសកម្មភាពអនុវត្តច្បាប់ នៅតាមដែនសមុទ្រ ហើយធ្វើប្រតិបត្តិការល្បាត​និងអធិការកិច្ចជាប់ជាប្រចាំ នៅក្នុងដែនទឹកក្បែរបរិវេណទីប្រជុំកោះ Kinmen របស់តៃវ៉ាន់ និងទីក្រុង Xiamen របស់ចិន។

គួរបញ្ជាក់ថា ទីប្រជុំកោះ Kinmen និង Matsu បានស្ថិតក្រោមការគ្រប់គ្រងរបស់តៃវ៉ាន់ ចាប់តាំងពីចុងបញ្ចប់នៃសង្រ្គាមស៉ីវិលចិន នៅឆ្នាំ១៩៤៩ ពេលដែលកងកម្លាំងរបស់លោក ចាង ខៃចៀក បានរត់ភៀសខ្លួនទៅកាន់កោះតៃវ៉ាន់ ក្រោយចាញ់កងកម្លាំងលោក ម៉ៅ សេទុង។ Kinmen ធ្លាប់ជាទីតាំងនៃការប៉ះទង្គិចគ្នាញឹកញាប់ រវាងទីក្រុងប៉េកាំងនិងទីក្រុងតៃប៉ិ អំលុងសម័យសង្រ្គាមត្រជាក់ ប៉ុន្តែសព្វថ្ងៃជាគោលដៅទេសចរណ៍ដ៏ពេញនិយមមួយ។ ទោះជាបែបនេះក្តី កូនកោះជាច្រើនដែលជាផ្នែកនៃទីប្រជុំកោះនេះ ត្រូវបានយោធាតៃវ៉ាន់​រឹតបន្តឹងការការពារជាខ្លាំង ហើយមិនអនុញ្ញាតឱ្យជនស៉ីវិលចេញចូលបានឡើយ៕

រូបភាពពី Reuters