(មូស្គូ)៖ ក្រុមការពារសិទ្ធិមនុស្សបានឱ្យដឹងថា មនុស្សជាង៤០០នាក់ត្រូវបានឃាត់ខ្លួន អំឡុងព្រឹត្តិការណ៍ប្រមូលផ្តុំនៅតាមទីក្រុងសរុបចំនួន៣២ ទូទាំងប្រទេសរុស្ស៉ី ក្រោយការស្លាប់របស់លោក Alexei Navalny ដែលជាគូប្រជែងលេចធ្លោជាងគេបង្អស់ របស់ប្រធានាធិបតីរុស្ស៉ី លោក វ៉្លាឌីមៀ ពូទីន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១៨ ខែកុម្ភៈ ឆ្នាំ២០២៤។

អាជ្ញាធរពន្ធនាគាររុស្ស៉ី បាននិយាយកាលពីថ្ងៃសៅរ៍ថា លោក Navalny អាយុ៤៧ឆ្នាំ បានសន្លប់បាត់បង់ស្មារតីរួចទទួលមរណភាពតែម្តង កាលពីថ្ងៃសុក្រសប្តាហ៍នេះ ក្រោយដើរហាត់ប្រាណ ក្នុងពន្ធនាគារមួយកន្លែងនៅតំបន់អាកទិច ជាទីដែលរូបលោកកំពុងអនុវត្តទោស ជាប់ពន្ធនាគាររយៈពេលសរុបទាំងអស់៣ទសវត្សរ៍។ក្រុមគ្រូពេទ្យបានព្យាយាមជួយដែរ តែមិនអាចសង្រ្គោះជីវិតលោកបាន។ មូលហេតុជាក់លាក់នៃការស្លាប់ មិនទាន់ត្រូវបានបញ្ជាក់ នៅឡើយទេ ខណៈគណៈកម្មាធិការស៊ើបអង្កេតមួយរបស់រុស្ស៉ី ថាខ្លួនបានបើកការស៊ើបអង្កេតហើយ៕

ក្រុម OVD-Info ដែលរាយការណ៍ពីស្ថានភាពសេរីភាព នៃការជួបជុំប្រមូលផ្តុំក្នុងប្រទេសរុស្ស៉ី បានអះអាងថា ការឃាត់ខ្លួនច្រើនជាងគេ គឺត្រូវបានធ្វើឡើងនៅទីក្រុង St Petersburg និងរដ្ឋធានីមូស្គូ ជាទីដែលលោក Navalny មានអ្នកគាំទ្រច្រើន។ បើតាមប្រភពដដែល មនុស្សយ៉ាងហោចជាង២០០នាក់ ត្រូវបានឃាត់ខ្លួន ក្នុងទីក្រុង St Petersburg។ វាគឺជាការឃាត់ខ្លួនមនុស្សច្រើនបំផុត អំឡុងព្រឹត្តិការណ៍​ពាក់ព័ន្ធនយោបាយនៅប្រទេសរុស្ស៉ី គិតចាប់តាំងតែពីខែកញ្ញា ឆ្នាំ២០២២មក ជាពេលដែលមនុស្សជាង ១,៣០០នាក់ ត្រូវបានឃាត់ខ្លួន អំឡុងបាតុកម្មប្រឆាំងការកែនកងទ័ពបម្រុង ដើម្បីបញ្ជូនទៅធ្វើសង្រ្គាមនៅអ៊ុយក្រែន។

គួរបញ្ជាក់ថា មរណភាពរបស់លោក Navalny នាពេលនេះ ធ្វើឱ្យក្រុមប្រឆាំងនៅរុស្ស៉ី ត្រូវបាត់បង់មេដឹកនាំលេចធ្លោបំផុតរបស់ខ្លួន ស្របពេលដែល​ប្រធានាធិបតីរុស្ស៉ី លោក វ៉្លាឌីមៀ ពូទីន កំពុងត្រៀមលក្ខណៈសម្រាប់ការបោះឆ្នោតសកល នាខែមីនា ខាងមុខ៕

រូបភាពពី Reuters