(ប៉េកាំង)៖ ក្រសួងការបរទេសចិន បានប្រកាសនៅថ្ងៃព្រហស្បតិ៍នេះថា ប្រមុខការទូតចិន លោក Wang Yi ក្នុងពេលប៉ុន្មានថ្ងៃខាងមុខនេះ នឹងបំពេញទស្សនកិច្ចទៅកាន់​ប្រទេសអាល្លឺម៉ង់ ដើម្បីចូលរួមសន្និសីទសន្តិសុខទីក្រុង Munich មុនពេលបន្តដំណើរទៅអេស៉្បាញ និង​បារាំង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី១៥ ខែកុម្ភៈ ឆ្នាំ២០២៤។

អ្នកនាំពាក្យក្រសួងការបរទេសចិន បានឱ្យដឹងក្នុងសេចក្តីថ្លែងការណ៍ថា ចាប់ពីថ្ងៃទី១៦ ដល់ថ្ងៃទី២១ ខែកុម្ភៈ លោករដ្ឋមន្រ្តីការបរទេសចិន នឹងចូលរួមសន្និសីទសន្តិសុខ Munich លើកទី៦០ ហើយបន្ទាប់មកទៀត រូបលោកនឹងបន្តទៅបំពេញទស្សនកិច្ចនៅអេស៉្បាញនិងបារាំង ខណៈនៅបារាំង លោក Wang នឹងបើកកិច្ចសន្ទនាយុទ្ធសាស្រ្តចិន-បារាំង។

គួរបញ្ជាក់ថា បើតាមសេចក្តីថ្លែងការណ៍ខាងលើ អំលុងសន្និសីទសន្តិសុខទីក្រុង Munich លោក Wang Yi នឹងថ្លែងសុន្ទរកថាបង្ហាញនូវគោលជំហររបស់ចិន ស្តីពីការកសាងសហគមន៍រួមវាសនាសម្រាប់មនុស្សជាតិ ក៏ដូចជាការលើកកម្ពស់ពិភពលោកពហុប៉ូល ដែលស្មើភាព​និងប្រកបដោយសណ្តាប់ធ្នាប់។ ចំណែក ដំណើរទស្សនកិច្ចរបស់លោកទៅកាន់អេស៉្បាញ នឹងជាលើកដំបូងបំផុតសម្រាប់ប្រមុខការទូតចិន ក្នុងរយៈពេល៦ឆ្នាំ៕

រូបភាពពី Reuters