(បេរូត)៖ ការវាយឆ្មក់របស់អ៊ីស្រាអែលនៅភាគខាងត្បូងប្រទេសលីបង់នៅថ្ងៃពុធសប្តាហ៍នេះ បានសម្លាប់ជនស៊ីវិល៤នាក់ ក្នុងនោះមានកុមារ ២នាក់ និង ៩នាក់ផ្សេងទៀតរងរបួស។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី១៤ ខែកុម្ភៈ ឆ្នាំ២០២៤។
ប្រភពសន្តិសុខបានប្រាប់ទីភ្នាក់ងារព័ត៌មានបារាំង AFP ដោយសុំមិនបញ្ចេញឈ្មោះដូច្នេះថា «ស្ត្រីម្នាក់ត្រូវបានសម្លាប់ រួមជាមួយនឹងកូនៗរបស់គាត់ចំនួនពីរនាក់ នៅក្នុងការវាយឆ្មក់ដែលកំណត់គោលដៅលើភូមិ Al-Sowaneh ខណៈដែលជនស៊ីវិលទី៤ ត្រូវបានសម្លាប់នៅក្នុងការវាយឆ្មក់លើអគារមួយនៅភូមិ Adshit»។
ប្រភពបានបន្ថែមថា មនុស្ស៩នាក់ផ្សេងទៀតបានរងរបួស ក្នុងការវាយឆ្មក់នៅភាគខាងត្បូងប្រទេសលីបង់។
គួរបញ្ជាក់ថា មួយរយៈចុងក្រោយនេះអ៊ីស្រាអែល បានបង្កើនការវាយឆ្មក់របស់ខ្លួនតាមផ្លូវអាកាស ដោយបានកំណត់គោលដៅផ្សេងៗគ្នាជាច្រើន នៅភាគខាងត្បូងប្រទេសលីបង់ ដែលមានចម្ងាយប្រហែល ១០ ទៅ ២៥ គីឡូម៉ែត្រពីព្រំដែន៕
