(ហ៊្សេរុយសាឡិម)៖ នៅថ្ងៃអង្គារនេះ ប្រមុខចារកម្មអ៉ីស្រាអែល បានចេញដំណើរទៅកាន់អេហ្ស៉ីប ដើម្បីពិភាក្សាគ្នាជាមួយសមភាគីអេហ្ស៉ីប និងសហរដ្ឋអាមេរិក ស្តីពីសំណើបទឈប់បាញ់សម្រាប់សង្រ្គាមតំបន់ហ្កាហ្សាស្រ្ទីប (Gaza Strip)។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី១៣ ខែកុម្ភៈ ឆ្នាំ២០២៤។

ប្រភពពីក្រុមមន្រ្តីអ៉ីស្រាអែល បានបង្ហើបឱ្យដឹងថា នាយកទីភ្នាក់ងារស៉ើបការណ៍សម្ងាត់ Mossad លោក David Barnea នឹងជួបលោក William Burns នាយកចារកម្មអាមេរិក CIA ហើយនៅរដ្ឋធានីគែររបស់អេហ្ស៉ីប អ្នកទាំងពីរនឹងត្រូវចូលរួមដោយនាយករដ្ឋមន្រ្តីកាតា Mohammed bin Abdulrahman Al-Thani ដែលមានតួនាទីជាប្រមុខការទូតកាតាផងដែរ និងធ្លាប់ជួយសម្រេចបានបទឈប់បាញ់កន្លងមក។

ចំណែកប្រភពពីទីក្រុងវ៉ាស៉ីនតោន បានឱ្យដឹងកាលពីថ្ងៃចន្ទសប្តាហ៍នេះថា លោក Burns នឹងត្រូវមានវត្តមាននៅទីក្រុងគែរ ដើម្បីចូលរួម​កិច្ចពិភាក្សា អំពីសំណើបទឈប់បាញ់ ដែលជួយសម្រុះសម្រួលដោយភាគីកាតា បន្ទាប់ពីអ៉ីស្រាអែលបានបដិសេធ លក្ខខណ្ឌឆ្លើយតបដំបូងកាលពីសប្តាហ៍មុន ពីសំណាក់ក្រុមហាម៉ាសប៉ាឡេស្ទីន ដែលគ្រប់គ្រងតំបន់ Gaza។

គួរបញ្ជាក់ថា នាយករដ្ឋមន្រ្តីអ៉ីស្រាអែល លោក Benjamin Netanyahu បានប្តេជ្ញាបន្តសង្រ្គាមដើម្បីកម្ទេចក្រុមហាម៉ាស តាមរយៈការ​បញ្ជូនកងទ័ពចូលវាយលុកទ្រង់ទ្រាយធំ លើទីក្រុង Rafah ដែលនៅព្រំដែនភាគខាងត្បូងតំបន់ Gaza និងជាទីដែលជនជាតិប៉ាឡេស្ទីន​ប្រមាណ១.៤លាននាក់ បាននាំគ្នារត់ទៅជ្រកកោន ដើម្បីគេចពីការប្រយុទ្ធគ្នា។ កាលពីថ្ងៃចន្ទ អ្នកនាំពាក្យក្រសួងការបរទេសអាមេរិក បាននិយាយថា ទីក្រុងវ៉ាស៉ីនតោនមិនគាំទ្រឡើយ ចំពោះប្រតិបត្តិការយោធាទ្រង់ទ្រាយធំ ដែលគ្មានផែនការច្បាស់លាស់ ដើម្បីការពារជនស៉ីវិល នៅ Rafah៕វ

រូបភាពពី AFP