(មូស្គូ)៖ ប្រព័ន្ធផ្សព្វផ្សាយរុស្ស៉ី បានរាយការណ៍ថា នាថ្ងៃអាទិត្យនេះ អវកាសយានិករុស្ស៉ី លោក Oleg Kononenko ត្រូវបានរំពឹងថា នឹងបំបែកកំណត់ត្រាពិភពលោក សម្រាប់រយៈពេលស្នាក់នៅសរុបក្នុងទីអវកាស យូរជាងគេបង្អស់គឺរហូតដល់ជិត២ឆ្នាំកន្លះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី៤ ខែកុម្ភៈ ឆ្នាំ២០២៥។

យោងតាមការរំពឹងទុក នៅវេលាម៉ោង១១៖៣០នាទីព្រឹកថ្ងៃអាទិត្យនេះ (ម៉ោងនៅទីក្រុងមូស្គូ) លោក Kononenko ដែលមានអាយុ៥៩ឆ្នាំ នឹងបំបែកកំណត់ត្រារបស់អវកាសយានិករុស្ស៉ីម្នាក់ទៀត គឺលោក Gennady Padalka ដែលបានស្នាក់នៅក្នុងទីអវកាស រយៈពេលសរុប​យូរជាងគេបង្អស់លើពិភពលោក ចំនួន៨៧៨ថ្ងៃ ១១ម៉ោង និង២៩នាទី អំលុងបេសកកម្មសរុបចំនួន៥ មុនចូលនិវត្តន៍កាលពីឆ្នាំ២០១៧។

លោក Kononenko កំពុងស្ថិតក្នុងការបំពេញបេសកកម្មអវកាសលើកទី៥ ហើយនៅពេលបញ្ចប់បេសកកម្មបច្ចុប្បន្ននេះ ដែលត្រូវបាន​កំណត់ថានឹងចប់នៅថ្ងៃទី២៣ ខែកញ្ញា ខាងមុខ រូបលោកនឹងចំណាយពេលស្ថិតក្នុងទីអវកាស បានរយៈពេលសរុបរហូតដល់១,១១០ថ្ងៃ។ លោក Kononenko បានធ្វើដំណើរឡើងទីអវកាសដំបូង កាលពីខែមេសា ឆ្នាំ២០០៨​ ក្នុងបេសកកម្មឆ្ពោះទៅស្ថានីយអវកាសអន្តរជាតិ ISS៕

រូបភាពពី Reuters