(ព្រុចសែល)៖ កាលពីថ្ងៃពុធសប្តាហ៍នេះ លោក Josep Borrell ដែលជាប្រមុខគោលនយោបាយការបរទេស របស់សហភាពអឺរ៉ុប (EU) បានប្រាប់ឱ្យដឹងថា ទាហានអ៊ុយក្រែនចំនួន២០,០០០នាក់បន្ថែមទៀត នឹងត្រូវទទួលការបណ្តុះបណ្តាលនៅ EU គិតត្រឹមដំណាច់រដូវក្តៅឆ្នាំនេះ។ នេះបើតាមការចេញផ្សាយដោយ ទីភ្នាក់ងារព័ត៌មានអាល្លឺម៉ង់ DPA នាថ្ងៃព្រហស្បតិ៍ ទី១ ខែកុម្ភៈ ឆ្នាំ២០២៤។

ថ្លែងក្នុងកិច្ចប្រជុំរដ្ឋមន្រ្តីការពារជាតិ EU នៅទីក្រុងព្រុចសែលនៃប្រទេសបែលហ្ស៉ិក លោក Borrell បាននិយាយថា បើបូករួមបញ្ចូលគ្នា​ជាមួយទាហានអ៊ុយក្រែន ដែលត្រូវបានបណ្តុះបណ្តាលរួចរាល់ ចំនួនទាហានអ៊ុយក្រែនសរុប ដែលឆ្លងកាត់ការហ្វឹកហាត់នៅសហភាពអឺរ៉ុប នឹងកើនដល់៦០,០០០នាក់។ នៅក្នុងថ្ងៃដដែល មុនការប្រកាសរបស់លោក Borrell ទីក្រុងបែរឡាំងបានឱ្យដឹងថា អាល្លឺម៉ង់មានផែនការ​បណ្តុះបណ្តាលទាហានអ៊ុយក្រែន ១០,០០០នាក់ថែមទៀត ក្នុងឆ្នាំនេះ ក្រោមក្របខណ្ឌនៃបេសកកម្មបណ្តុះបណ្តាលយោធារបស់ EU។

បង្កើតឡើងដំបូងកាលពីខែវិច្ឆិកា ឆ្នាំ២០២២ ក្រោយរុស្ស៉ីចូលឈ្លានពានអ៊ុយក្រែន នៅខែកុម្ភៈ ឆ្នាំដដែលនោះ បេសកកម្មបណ្តុះបណ្តាល​យោធាខាងលើរបស់ EU ដំបូងឡើយ មានគោលដៅជួយបង្វឹកកងទ័ពអ៊ុយក្រែន ត្រឹម១៥,០០០នាក់ប៉ុណ្ណោះ នៅអាល្លឺម៉ង់ ប៉ូឡញ និងនៅ​ប្រទេស EU ដទៃទៀត។ ក្រោយមក គោលដៅក៏ត្រូវបានបង្កើនជាបន្តបន្ទាប់ ខណៈមកទល់ឥឡូវ ទាហានអ៊ុយក្រែនជិត៤០,០០០នាក់ បានទទួលការបណ្តុះបណ្តាល តាមរយៈកម្មវិធីរបស់សហភាពអឺរ៉ុប។

គួរបញ្ជាក់ថា នៅអាល្លឺម៉ង់ កងទ័ពអ៊ុយក្រែនបានហ្វឹកហាត់ប្រើប្រាស់ ប្រព័ន្ធការពារដែនអាកាស Patriot, រថក្រោះ Leopard 1 និង 2, រថពាសដែក Marder ព្រមទាំងទទួលបានការបង្ហាត់បង្រៀនការសង្រ្គោះផ្នែកវេជ្ជសាស្រ្ត និងយុទ្ធសាស្រ្តសឹក ជាដើម៕

រូបភាពពី Reuters