(តៃប៉ិ)៖ ក្រសួងការពារជាតិតៃវ៉ាន់ បានរាយការណ៍នៅថ្ងៃសៅរ៍នេះថា យន្តហោះយោធាចិនសរុបជាង៣០គ្រឿង ត្រូវបានប្រទះឃើញធ្វើប្រតិបត្តិការ នៅ​ក្បែរកោះតៃវ៉ាន់ ក្នុងរយៈពេល២៤ម៉ោងចុងក្រោយ ដែលវាគឺជាការសម្ញែងសាច់ដុំធំសម្បើមមួយរបស់ចិន គិតចាប់តាំងតៃវ៉ាន់បានបោះឆ្នោត​រើសមេដឹកនាំថ្មី កាលពីពាក់កណ្តាលខែមករានេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសៅរ៍ ទី២៧ ខែមករា ឆ្នាំ២០២៤។

ក្រសួងការពារជាតិតៃវ៉ាន់ បានឱ្យដឹងក្នុងសេចក្តីថ្លែងការណ៍ថា ក្នុងរយៈពេល២៤ម៉ោងចុងក្រោយ គិតត្រឹមម៉ោង៦ព្រឹកថ្ងៃសៅរ៍នេះ ខ្លួនបានប្រទះឃើញ យន្តហោះយោធាចិនចំនួន៣៣គ្រឿង ព្រមទាំងនាវាយោធា៧គ្រឿង ធ្វើប្រតិបត្តិការនៅក្បែរៗកោះតៃវ៉ាន់។ ក្នុងចំណោមនោះ យន្តហោះ១៣គ្រឿង បានហោះឆ្លងខ្សែបន្ទាត់មេដ្យាននៃច្រកសមុទ្រតៃវ៉ាន់ ដែលពីមុនមកធ្លាប់បម្រើជារនាំងមិនផ្លូវការ ​រវាងប្រទេសចិននិងតៃវ៉ាន់ ប៉ុន្តែឥឡូវត្រូវបានចិនបញ្ជូនយន្តហោះយោធា ឱ្យហោះឆ្លងកាត់ជាប្រចាំ។ មិនតែប៉ុណ្ណោះ តៃវ៉ាន់ក៏បានប្រទះឃើញ​បាឡុងចិន២គ្រឿងផងដែរ នៅលើច្រកសមុទ្រតៃវ៉ាន់។

គួរបញ្ជាក់ថា តៃវ៉ាន់ត្រូវចិនចាត់ទុកជាផ្នែកនៃទឹកដីរបស់ខ្លួន ហើយចិនមិនដែលបោះបង់ចោលជម្រើស នៃការបង្រួបបង្រួមគ្នាវិញ​ជាមួយតៃវ៉ាន់ ដោយត្រូវប្រើប្រាស់កម្លាំងយោធានោះឡើយ។ នៅមុនការបោះឆ្នោតរើសមេដឹកនាំតៃវ៉ាន់ កាលពីថ្ងៃទី១៣ ខែមករានេះ ទីក្រុងប៉េកាំងបានព្រមានថា បេក្ខជនមានប្រជាប្រិយភាពជាងគេ គឺលោក Lai Ching-te ដែលជាមេដឹកនាំរងបច្ចុប្បន្នរបស់តៃវ៉ាន់ ហើយត្រូវចិនហៅថាបុគ្គលចង់បំបែករដ្ឋដ៏គ្រោះថ្នាក់ នឹងនាំមកនូវសង្រ្គាមក៏ដូចជាឱនភាពដល់តៃវ៉ាន់ ប្រសិនបើប្រជាជនតៃវ៉ាន់នាំគ្នាបោះឆ្នោតឱ្យ ទោះបែបនេះក៏ដោយ​ លោក Lai នៅតែបានទទួលជ័យជម្នះក្នុងការបោះឆ្នោតនោះ ដែលធ្វើឱ្យគណបក្សកាន់អំណាច DPP បន្តឈ្នះ​សម្រាប់អាណត្តិទី៣ជាប់គ្នា មិនធ្លាប់មានពីមុនមកឡើយ៕

រូបភាពពី Xinhua