(ប៉េកាំង)៖ កាលពីថ្ងៃសុក្រសប្តាហ៍នេះ ទីក្រុងប៉េកាំងបានប្រកាសឱ្យដឹងថា កាលពីឆ្នាំ២០២២ ខ្លួនបានផ្តន្ទាទោសជនជាតិអង់គ្លេសម្នាក់ ឱ្យជាប់ពន្ធនាគាររយៈពេល៥ឆ្នាំ សម្រាប់ការប្រព្រឹត្តសកម្មភាពស៉ើបការណ៍សម្ងាត់។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មាន AFP នាថ្ងៃសៅរ៍ ទី២៧ ខែមករា ឆ្នាំ២០២៤។

អ្នកនាំពាក្យក្រសួងការបរទេសចិន លោក Wang Wenbin បាននិយាយថា តុលាការនៅទីក្រុងប៉េកាំង កាលពីឆ្នាំ២០២២ បានសម្រេច​កាត់ទោសចុងចោទជនជាតិអង់គ្លេសខាងលើ ដាក់ពន្ធនាគារ៥ឆ្នាំ សម្រាប់បទល្មើស នៃការប្រមូលព័ត៌មានសម្ងាត់ដោយខុសច្បាប់ យកទៅ​ឱ្យតួអង្គនៅឯក្រៅប្រទេស។ លោក Wang បានបន្តថា ក្រោយការដាក់ពាក្យបណ្តឹងឧទ្ធរណ៍ សាលក្រមសំណុំរឿងនេះ​ ត្រូវបានតុលាការ​សម្រេចតម្កល់ឱ្យនៅដដែល កាលពីខែកញ្ញា ឆ្នាំ២០២៣។

គួរបញ្ជាក់ថា វាគឺជាការទទួលស្គាល់ផ្លូវការ ពីសំណាក់រដ្ឋាភិបាលទីក្រុងប៉េកាំង បន្ទាប់ពីក្នុងសប្តាហ៍នេះ កាសែតអាមេរិក Wall Street Journal បានរាយការណ៍ពី សំណុំរឿងពាណិជ្ជករជនជាតិអង់គ្លេសម្នាក់ ឈ្មោះ Ian Stones ដោយយោងតាមប្រភពពីគ្រួសារលោកផ្ទាល់ និងពី​ប្រភពដទៃទៀតថា រូបលោកបានបាត់ខ្លួនតាំងតែពីឆ្នាំ២០១៨ ក្រោយបំពេញការងាររាប់ទសវត្សរ៍ នៅឯប្រទេសចិន៕