(អង់ការ៉ា)៖ កាលពីថ្ងៃព្រហស្បតិ៍សប្តាហ៍នេះ ប្រធានាធីបតីតួកគីលោក Tayyip Erdogan ទីបំផុតបានយល់ព្រមជាផ្លូវការ ឱ្យស៊ុយអែតចូលរួមក្នុងអង្គការណាតូ (NATO) បន្ទាប់ពីអូសបន្លាយពេលអស់ជាច្រើនខែ ហើយឥលូវនៅសល់តែហុងគ្រីប៉ុណ្ណោះ ដែលនៅជា​ឧបសគ្គ មុនពេលទីក្រុងស្តុកខុល អាចក្លាយជាសមាជិកបក្សសម្ព័ន្ធយោធា​មួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២៦ ខែមករា ឆ្នាំ២០២៤។

សេចក្តីប្រកាសព័ត៌មានពីការិយាល័យលោក Erdogan បានបង្ហាញថា លោកប្រធានាធិបតីតួគកី បានចុះហត្ថលេខាជាផ្លូវការលើ ការផ្តល់​សច្ចាប័នពីសំណាក់សភាតួកគី ចំពោះសមាជិកភាពណាតូរបស់ស៊ុយអែត ដែលត្រូវបានធ្វើឡើងក្នុងសប្តាហ៍នេះ ពោលគឺរយៈពេល២០ខែ បន្ទាប់ពីទីក្រុងស្តុកខុល បានដាក់ពាក្យស្នើសុំចូលរួមក្នុងណាតូ ក្រោយសង្រ្គាមឈ្លានពានរបស់រុស្ស៉ី ផ្ទុះឡើងនៅអ៊ុយក្រែន។

នាយករដ្ឋមន្រ្តីស៊ុយអែត លោក Ulf Kristersson បានស្វាគមន៍ការយល់ព្រមរបស់តួកគី ហើយរដ្ឋមន្រ្តីការបរទេសស៊ុយអែត លោក Tobias Billstrom បានលើកឡើងថា នាពេលនេះ នៅសល់តែការផ្តល់សច្ចាប័នពីហុងគ្រីមួយទៀតប៉ុណ្ណោះ គឺស៊ុយអែតនឹងបានក្លាយជា​សមាជិកផ្លូវការរបស់ណាតូហើយ។

គួរបញ្ជាក់ថា ក្រោយបើកផ្លូវទទួលយកស៊ុយអែត ទីក្រុងអង់ការ៉ារំពឹងសហរដ្ឋអាមេរិក នឹងចាប់ផ្តើមធ្វើការលើការធានាឱ្យបាន នូវការអនុម័តពីសភាអាមេរិក សម្រាប់គម្រោងលក់យន្តហោះចម្បាំង F-16 គិតជាទឹកប្រាក់សរុប២០ពាន់លានដុល្លារឱ្យតួកគី ខណៈការលក់យន្តហោះយោធានេះ ត្រូវបានទាំងលោក Erdogan ផ្ទាល់ និងក្រុមសមាជិកសភាអាមេរិក ទាញភ្ជាប់ទៅនឹងការផ្តល់សច្ចាប័នលើសមាជិកភាពណាតូរបស់​ស៊ុយអែត៕

រូបភាពពី Reuters