(ព្រុចស៊ែល)៖ នៅក្នុងការហៅទូរសព្ទមួយនៅថ្ងៃពុធនេះ នាយករដ្ឋមន្ត្រីហុងគ្រី លោក Viktor Orban បានប្រាប់អគ្គលេខាធិការអង្គការណាតូ លោក Jens Stoltenberg ថា ដ្ឋាភិបាលហុងគ្រីគាំទ្រសមាជិកភាពរបស់ប្រទេសស៊ុយអែតក្នុងសម្ព័ន្ធភាពយោធា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២៤ ខែមករា ឆ្នាំ២០២៤។

លោក Orban បាន​និយាយ​នៅ​ក្នុង​ការ​បង្ហោះក្នុងបណ្តាញទំនាក់ទំនង X ​ដូច្នេះថា «ខ្ញុំ​សូមបញ្ជាក់​ជា​ថ្មី​ថា រដ្ឋាភិបាល​ហុងគ្រី​គាំទ្រ​ដល់​សមាជិកភាព​របស់​ស៊ុយអែត​ក្នុង​អង្គការណាតូ »។ លោកបានបន្ថែមថា លោកក៏បានជូនដំណឹងដល់ លោក Stoltenberg ថា លោកនឹងបន្តជំរុញឱ្យរដ្ឋសភាហុងគ្រី បោះឆ្នោតគាំទ្រការចូលជាសមាជិកណាតូ របស់ប្រទេសស៊ុយអែត និងផ្តល់សច្ចាប័នឱ្យបានឆាប់តាមដែលអាចធ្វើទៅបាន។

អគ្គលេខាធិការអង្គការណាតូ លោក Stoltenberg បាននិយាយបន្ទាប់ពីការប្រកាសនេះថា លោក Orban និងរដ្ឋាភិបាលរបស់គាត់គាំទ្រយ៉ាងច្បាស់លាស់ ចំពោះការចូលរួមរបស់ស៊ុយអែតក្នុងសម្ព័ន្ធយោធាណាតូ។

គួរបញ្ជាក់ថា សភារបស់ប្រទេសតួកគីកាលពីថ្ងៃអង្គារ បានអនុម័តការចូលជាសមាជិករបស់ប្រទេសស៊ុយអែត ទៅក្នុងសម្ព័ន្ធមិត្តយោធាលោកខាងលិចដ៏មានឥទ្ធិពលមួយនេះ ដែលធ្វើឱ្យប្រទេសហុងគ្រីក្លាយជាសមាជិកណាតូតែមួយគត់ ដែលមិនទាន់បានផ្តល់សច្ចាប័នលើសមាជិកភាព៕