(សិង្ហបុរី)៖ ប៉ូលិសនៃប្រទេសសិង្ហបុរីបានឱ្យដឹងថា មនុស្សសរុបជាង៦,៣០០នាក់ បានក្លាយជាជនរងគ្រោះក្នុងសកម្មភាពឆបោក ហៅថា «មិត្តក្លែងក្លាយ» កាលពីឆ្នាំ២០២៣ ហើយបើគិតជារួមអ្នកទាំងនោះ បានចាញ់បោកថវិកាសរុបរួមគ្នាអស់ជិត១៦លានដុល្លារ។ នេះបើតាម​ការចេញផ្សាយដោយទីភ្នាក់ងារព័ត៌មាន AFP នាថ្ងៃពុធ ទី២៤ ខែមករា ឆ្នាំ២០២៤។

ក្នុងការប្រព្រឹត្តសកម្មភាពឆបោកខាងលើ គឺពួកឧក្រិដ្ឋជនទាក់ទងទៅកាន់ជនរងគ្រោះ ហើយក្លែងបន្លំធ្វើជាមិត្តភក្តិ ឬក៏អ្នកស្គាល់គ្នា រួចស្នើសុំ​ជំនួយផ្នែកហិរញ្ញវត្ថុពីពួកគេ។ ក្នុងសេចក្តីថ្លែងការណ៍កាលពីថ្ងៃអង្គារសប្តាហ៍នេះ ប៉ូលិសសិង្ហបុរីបាននិយាយថា សកម្មភាពឆបោកនេះ បានធ្វើឱ្យជនរងគ្រោះទាំងអស់ បាត់បង់ថវិកាសរុបចូលគ្នា គឺចំនួន២១.១លានដុល្លារសិង្ហបុរី ដែលស្មើនឹង១៥.៧លានដុល្លារអាមេរិក កាលពីចន្លោះខែមករា ដល់ខែវិច្ឆិកា ឆ្នាំ២០២៣។

គួរបញ្ជាក់ថា ក្នុងពេលប៉ុន្មានឆ្នាំមកនេះ សិង្ហបុរីបានមើលឃើញការកើនឡើងខ្លាំងនៃអំពើឆបោក ដោយអាជ្ញាធរ បានចេញសារព្រមាន​ជាញឹកញាប់ ទៅកាន់សាធារណជន ឱ្យប្រុងប្រយ័ត្នអំពីមធ្យោបាយឆបោកថ្មីៗរបស់ក្រុមឧក្រិដ្ឋជន។ ក្នុងសំណុំរឿងថ្មីចុងក្រោយគេ ជនជាតិ​ម៉ាឡេស៉ី៥នាក់ ត្រូវបានធ្វើបត្យាប័នកាលពីថ្ងៃអង្គារមកកាន់សិង្ហបុរី ជុំវិញសកម្មភាពឆបោក «មិត្តក្លែងក្លាយ» ដែលពាក់ព័ន្ធការបោកប្រាស់លុយពីជនរងគ្រោះ បានសរុបជាង១លានដុល្លារ៕

រូបភាពពី Reuters