(កៀវ)៖ មន្ត្រីក្នុងតំបន់បានរាយការណ៍ថា ការបាញ់ផ្លោងនៅលើទីផ្សារមួយនៃក្រុង Donetsk របស់ប្រទេសអ៊ុយក្រែន ដែលកាន់កាប់ដោយរុស្ស៊ី បានសម្លាប់មនុស្សយ៉ាងហោចណាស់ ២៥ នាក់។ នេះបើយោងតាមការចុះផ្សាយដោយសារព័ត៌មាន AP នៅថ្ងៃទី២១ ខែមករា ឆ្នាំ២០២៤។

លោក Denis Pushilin ប្រធានអាជ្ញាធររុស្ស៊ីនៅទីក្រុង Donetsk បាននិយាយថា មនុស្ស ២០ នាក់ផ្សេងទៀតបានរងរបួស នៅក្នុងការវាយប្រហារនៅជាយក្រុង Tekstirshik រួមទាំងកុមារពីរនាក់ផងដែរ។ លោក​និយាយទៀតថា គ្រាប់​ផ្លោង​ត្រូវ​បាន​បាញ់​ដោយ​យោធា​អ៊ុយក្រែន។

ទោះយ៉ាងណា ទីក្រុងកៀវមិន​បាន​ធ្វើ​អត្ថាធិប្បាយ​លើ​ឧប្បត្តិហេតុ​នោះ​ទេ ហើយ​សារព័ត៌មាន AP ក៏មិន​អាច​ផ្ទៀងផ្ទាត់​ការ​អះអាង​ដោយ​ឯករាជ្យ​នោះ​ដែរ។

លោក Pushilin បានគូសបញ្ជាក់ថា តំបន់នេះត្រូវបានទទួលរងនូវការបាញ់ផ្លោងកាំភ្លើងធំ ដែលត្រូវបានបាញ់ចេញពីទិសដៅនៃតំបន់ Kurakhove និង Krasnohorivka ទៅភាគខាងលិច។

នៅក្នុងសេចក្តីថ្លែងការណ៍មួយ ក្រសួងការបរទេសរុស្ស៊ីបានពណ៌នាការវាយប្រហារដែលខ្លួនបានស្តីបន្ទោសទៅលើអ៊ុយក្រែនថាជា «ការវាយប្រហារភេរវកម្ម» ដោយបានបន្ថែមថា «ការវាយប្រហារភេរវកម្មដែលធ្វើឡើងដោយរបបទីក្រុងកៀវនេះ បង្ហាញយ៉ាងច្បាស់ពីកង្វះឆន្ទៈនយោបាយក្នុងការសម្រេចបានសន្តិភាព និងដោះស្រាយជម្លោះនេះតាមរយៈមធ្យោបាយការទូត»។

នៅថ្ងៃអាទិត្យផងដែរ មន្ត្រីក្នុងតំបន់បាននិយាយថា អគ្គីភ័យបានឆាបឆេះនៅឯស្ថានីយ៍ដឹកជញ្ជូនសារធាតុគីមីមួយកន្លែង ក្នុងកំពង់ផែ Ust-Luga របស់រុស្ស៊ី បន្ទាប់ពីការផ្ទុះពីរលើក ខណៈប្រព័ន្ធផ្សព្វផ្សាយក្នុងស្រុកបានរាយការណ៍ថា កំពង់ផែនេះត្រូវបានវាយប្រហារដោយយន្តហោះដ្រូនរបស់អ៊ុយក្រែន បណ្តាលឱ្យធុងប្រេងផ្ទុះ។

ចំណែកឯ នៅក្នុងសមរភូមិជួរមុខ ក្រសួងការពារជាតិរុស្ស៊ីបានប្រកាសនៅថ្ងៃអាទិ្យនេះផងដែរថា កងកម្លាំងម៉ូស្គូបានកាន់កាប់ភូមិ Krokhmalin ក្នុងតំបន់ Kharkiv របស់អ៊ុយក្រែន។ ហើយកងកម្លាំង​អ៊ុយក្រែន​បាន​បញ្ជាក់​ពី​ការ​កាន់កាប់​នេះផងដែរ ប៉ុន្តែ​បាន​ពណ៌នា​វាថាជា «បាតុភូត​បណ្តោះអាសន្ន» ប៉ុណ្ណោះ៕