(តូក្យូ)៖ នៅថ្ងៃព្រហស្បតិ៍នេះ ជប៉ុនបានចុះហត្ថលេខាជាផ្លូវការលើកិច្ចព្រមព្រៀង ជាមួយសម្ព័ន្ធមិត្តរបស់ខ្លួនគឺសហរដ្ឋអាមេរិក ដើម្បីទិញមីស៉ីលរយៈចម្ងាយឆ្ងាយ Tomahawk សរុប៤០០គ្រាប់ ខណៈទីក្រុងតូក្យូកំពុងព្យាយាមពង្រឹងសមត្ថភាពយោធា ដើម្បីទប់ទល់ចំពោះ​ការគំរាមកំហែងផ្នែកសន្តិសុខ នៅក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី១៨ ខែមករា ឆ្នាំ២០២៤។

មន្រ្តីការពារជាតិជប៉ុនម្នាក់បានឱ្យដឹងថា កិច្ចព្រមព្រៀងខាងលើ ត្រូវបានចុះហត្ថលេខានៅទីក្រុងតូក្យូ ហើយដំណើរការទិញមីស៉ីល នឹងត្រូវ​ចាប់ផ្តើមជាផ្លូវការ។ ការលក់ដែលមានទំហំទឹកប្រាក់២.៣៥ពាន់លានដុល្លារ សម្រាប់មីស៉ីល Tomahawk ពីរប្រភេទ ដែលអាចបាញ់បានចម្ងាយ ១,៦០០គីឡូម៉ែត្រ ត្រូវបានអនុម័តយល់ព្រមដោយទីក្រុងវ៉ាស៉ីនតោន កាលពីខែវិច្ឆិកា ឆ្នាំ២០២៣។

ចំពោះមុខការកើនឡើងនៃអំណាចយោធារបស់ចិន បូករួមជាមួយការគំរាមកំហែងនៃមីស៉ិលបាលិស្ទីគ និងអាវុធនុយក្លេអ៊ែររបស់កូរ៉េខាងជើង រដ្ឋាភិបាលជប៉ុន មានផែនការបង្កើនកញ្ចប់ថវិកាការពារជាតិទ្វេដង ឱ្យដល់កម្រិតស្តង់ដាដូចអង្គការណាតូ (NATO) គឺ២ភាគរយនៃ GDP នៅឆ្នាំ២០២៧។

គួរបញ្ជាក់ថា កាលពីខែធ្នូ ចុងឆ្នាំមុន ទីក្រុងតូក្យូបានបន្ធូរបន្ថយ គោលការណ៍នាំចេញសព្វាវុធរបស់ខ្លួន ដើម្បីអាចលក់មីស៉ីលសម្រាប់ប្រើ​ជាមួយប្រព័ន្ធ Patriot ដែលផលិតនៅក្នុងប្រទេសជប៉ុនក្រោមអាជ្ញាបណ្ណ ឱ្យទៅសហរដ្ឋអាមេរិក ស្របពេលដែលទីក្រុងវ៉ាស៉ីនតោន កំពុងព្យាយាមបំពេញស្តុកសព្វាវុធរបស់ខ្លួនឡើងវិញ បន្ទាប់ពីបានខិតខំផ្គត់ផ្គង់ពួកវាឱ្យទៅអ៊ុយក្រែន ដែលស្ថិតក្នុងសង្រ្គាមអូសបន្លាយជាមួយរុស្ស៉ី៕

រូបភាពពីកងទ័ពជើងទឹកអាមេរិក